മലയാള സിനിമയിൽ ആദ്യമായി 300 കോടി ക്ലബ്ബിൽ ഇടംനേടി ചരിത്രം കുറിച്ച ‘ലോക’ എന്ന ചിത്രത്തിന്റെ രണ്ടാം ഭാഗത്തിനായുള്ള കാത്തിരിപ്പിലാണ് സിനിമാലോകം. ചിത്രത്തിന്റെ സംവിധായകൻ ഡൊമിനിക് അരുണിലുള്ള പൂർണ്ണ വിശ്വാസം വെളിപ്പെടുത്തിയിരിക്കുകയാണ് നടൻ ടൊവിനോ തോമസ്. ഒരു അഭിമുഖത്തിലാണ് താരം സിനിമയെക്കുറിച്ചുള്ള പ്രതീക്ഷകൾ പങ്കുവെച്ചത്.ആദ്യ ഭാഗത്തിൽ താൻ അവതരിപ്പിച്ച ചാത്തൻ എന്ന കഥാപാത്രത്തെ എങ്ങനെ മികച്ചതാക്കാം എന്നതിൽ തനിക്ക് തുടക്കത്തിൽ ആശങ്കയുണ്ടായിരുന്നുവെന്ന് ടൊവിനോ വെളിപ്പെടുത്തി. സ്ക്രിപ്റ്റ് വായിച്ചപ്പോൾ തന്റെ ഭാഗങ്ങൾ രസകരമായി തോന്നിയെങ്കിലും, ചാത്തന്റെ ചിരിയും ഭാവങ്ങളും എങ്ങനെയായിരിക്കുമെന്ന് കണ്ടെത്താൻ പ്രയാസപ്പെട്ടിരുന്നു. എന്നാൽ സംവിധായകൻ ഡൊമിനിക് നൽകിയ ആത്മവിശ്വാസമാണ് ആ കഥാപാത്രത്തെ പൂർണ്ണതയിലെത്തിക്കാൻ സഹായിച്ചതെന്നും ഇരുവരും തമ്മിലുള്ള ആത്മബന്ധമാണ് സിനിമയുടെ കരുത്തെന്നും ടൊവിനോ കൂട്ടിച്ചേർത്തു.
ലോക 2 വിന്റെ ചിത്രീകരണം 2026 അവസാനത്തോടെ ആരംഭിക്കുമെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. 2027 ഓണം റിലീസായി ചിത്രം തിയേറ്ററുകളിൽ എത്തിക്കാനാണ് അണിയറപ്രവർത്തകർ ലക്ഷ്യമിടുന്നത്. രണ്ടാം ഭാഗം പ്രധാനമായും ടൊവിനോ അവതരിപ്പിക്കുന്ന ചാത്തൻ എന്ന കഥാപാത്രത്തെ കേന്ദ്രീകരിച്ചായിരിക്കും മുന്നോട്ട് പോകുന്നത്. കൂടാതെ, ആദ്യ ഭാഗത്തിൽ അതിഥി വേഷത്തിലെത്തിയ ദുൽഖർ സൽമാന്റെ ഒടിയൻ എന്ന കഥാപാത്രവും രണ്ടാം ഭാഗത്തിൽ പ്രധാന വേഷത്തിൽ ഉണ്ടാകുമെന്ന സൂചനകൾ ആരാധകർക്കിടയിൽ വലിയ ആവേശം സൃഷ്ടിച്ചിട്ടുണ്ട്.
കള്ളിയങ്കാട്ട് നീലിയുടെ ഐതിഹ്യത്തിൽ നിന്ന് പ്രചോദനം ഉൾക്കൊണ്ട് നിർമ്മിച്ച ലോക വെറും 24 ദിവസം കൊണ്ടാണ് മലയാളത്തിലെ ഏറ്റവും ഉയർന്ന ഗ്രോസർ എന്ന റെക്കോർഡ് സ്വന്തമാക്കിയത്. കല്യാണി പ്രിയദർശൻ, നസ്ലെൻ എന്നിവർ കേന്ദ്രകഥാപാത്രങ്ങളായെത്തിയ ഈ ഫാന്റസി ചിത്രം അഞ്ച് ഭാഗങ്ങളുള്ള ഒരു സിനിമാറ്റിക് യൂണിവേഴ്സിന്റെ തുടക്കമാണ്. വേഫെറർ ഫിലിംസിന്റെ ബാനറിൽ ദുൽഖർ സൽമാൻ നിർമ്മിച്ച ഈ ബിഗ് ബഡ്ജറ്റ് ചിത്രം മലയാള സിനിമയുടെ വിപണി സാധ്യതകളെ ആഗോളതലത്തിൽ ഉയർത്തുന്നതിൽ പ്രധാന പങ്കുവഹിച്ചു.
