ഒരൊറ്റ സിനിമ കൊണ്ട് തന്നെ മലയാളികളുടെ മനസില് ഒരിക്കലും മായാത്ത ഇടം നേടിയ നടിയാണ് ദീപ നായര്. കുഞ്ചാക്കോ ബോബന്റെ നായികയായി അഭിനയിച്ച പ്രിയത്തിലൂടെയാണ് ദീപ നായര് ആ സ്ഥാനം നേടുന്നത്. എന്നാല് പ്രിയത്തിന് ശേഷം പിന്നീടൊരു സിനിമയിലും ദീപ അഭിനയിച്ചില്ല. താരം ഇന്ന് വിദേശത്ത് സ്ഥിരതാമസമാക്കിയിരിക്കുകയാണ്. സോഷ്യല് മീഡിയയില് സജീവമാണ് ദീപ.വര്ഷങ്ങള്ക്ക് ശേഷം തന്റെ പിന്മാറ്റത്തെക്കുറിച്ച് സംസാരിക്കുകയാണ് ദീപ. ‘പ്രിയം കഴിഞ്ഞ് എന്തുകൊണ്ടാണ് വേറെ സിനിമകളിലൊന്നും അഭിനയിക്കാത്തത്? പലരും കമന്റുകളിലൂടേയും മെസേജുകളിലൂടേയും എന്നോട് ചോദിച്ചുകൊണ്ടിരിക്കുന്ന ചോദ്യമാണിത്. കുറേ കമന്റുകള്ക്ക് മറുപടി കൊടുക്കാന് ശ്രമിച്ചിരുന്നു. എല്ലാ മെസേജുകള്ക്കും മറുപടി കൊടുക്കാന് സാധിക്കില്ല” എന്ന് പറഞ്ഞു കൊണ്ടാണ് ദീപ കാര്യത്തിലേക്ക് കടന്നത്. ആ വാക്കുകളിലേക്ക്:
എന്തുകൊണ്ടാണ് പിന്നീട് സിനിമകളിലൊന്നും അഭിനയിക്കാത്തത്? പ്രിയത്തിലെ അനുഭവം അത്രയും മോശമായിരുന്നുവോ? എന്നൊക്കെ ചിലര് ചോദിച്ചിരുന്നു. അങ്ങനെയൊന്നുമല്ല. പ്രിയത്തിന്റെ സെറ്റ് വളരെ രസകരമായിരുന്നു. കുട്ടികളൊക്കെയായി ഭയങ്കര രസമായിരുന്നു. എന്താണ് സംഭവിച്ചത് എന്നു വച്ചാല്, സിനിമാലോകത്തേക്കുള്ള എന്റെ എന്ട്രി എത്രത്തോളം അണ്പ്ലാന്ഡ് ആയിരുന്നുവോ അത്ര തന്നെ അണ്എക്സ്പെക്റ്റഡ് ആയിരുന്നു എന്റെ ഏക്സിറ്റും.പ്രിയം കഴിഞ്ഞപ്പോള് രണ്ട്, മൂന്ന് അവസരങ്ങള് വന്നിരുന്നു. പക്ഷെ അതൊന്നും അത്ര നല്ല വേഷങ്ങളായിരുന്നില്ല. എന്റെ എഞ്ചിനീയറിങ് പഠിത്തം കളഞ്ഞിട്ട് പോയി ചെയ്യാന് മാത്രം നല്ല വേഷങ്ങളായിരുന്നില്ല. അച്ഛനും അമ്മയും ഞാനും കൂടി കോഴ്സ് കഴിയട്ടെ എന്ന് തീരുമാനിച്ചു. ഡിഗ്രി കഴിയട്ടെ, അതിന് ശേഷം എങ്ങനെയുള്ള വേഷങ്ങളാണ് വരുന്നതെന്ന് നോക്കി ചെയ്യാമെന്നായിരുന്നു തീരുമാനം.
പക്ഷെ സത്യം പറയാമല്ലോ, ഒരൊറ്റ ഓഫര് പോലും വന്നില്ല. പ്രിയത്തിന്റെ റിലീസിനും എഞ്ചീനിയറിങ് പൂര്ത്തിയാക്കുന്നതിനും ഇടയില് ഒന്നര വര്ഷത്തിന്റെ ഇടവേളയുണ്ട്. ആ സമയത്തിനുള്ളില് തന്നെ എന്റെ റെലവന്സ് പോയി. ഇന്നത്തേത് പോലെ അന്ന് സോഷ്യല് മീഡിയയില്ല. എന്റെ ആക്ടിവിറ്റികളൊന്നും സിനിമാ ഫീല്ഡുമായി ബന്ധപ്പെട്ടുള്ളതല്ല. അതിനാല് ആളുകള് അക്ഷരാര്ത്ഥത്തില് എന്നെ മറന്നുപോയി. ഇങ്ങനൊരു നടിയുണ്ടെന്ന് മറന്നുപോയി. മിടുക്കികളായ നവ്യ നായരും മീര ജാസ്മിനും ഭാവനയുമൊക്കെ വന്ന സമയവുമാണ്. അതിനാല് വേറെ ഒരാളുണ്ടെന്ന കാര്യം തന്നെ അവര് മറന്നു. ഞാന് പഠിക്കാന് ഏറെ ഇഷ്ടപ്പെട്ടിരുന്നു. പുറത്തു പോയി മാസ്റ്റേഴ്സ് ചെയ്യണം എന്നായിരുന്നു. അങ്ങനെ മെല്ബണ് യൂണിവേഴ്സിറ്റിയിലെത്തുകയും മാസ്റ്റര് നേടുകയും ചെയ്തു. ഉടനെ തന്നെ ജോലിയും തുടങ്ങി. അങ്ങനെ സിനിമാ ലോകത്തു നിന്നും പൂര്ണമായി മാറിപ്പോവുകയും ചെയ്തു.
