പ്രശസ്ത ഗായികയും ഗാനരചയിതാവുമായ മൈലി സൈറസ് സംഗീതജ്ഞൻ മാക്സ് മൊറാൻഡോയെ വിവാഹം കഴിച്ചു. കാലിഫോർണിയയിലെ പാം സ്പ്രിംഗ്സിലുള്ള ഒരു സ്വകാര്യ വസതിയിൽ, അടുത്ത കുടുംബാംഗങ്ങളുടെയും സുഹൃത്തുക്കളുടെയും സാന്നിധ്യത്തിലായിരുന്നു വിവാഹ ചടങ്ങുകൾ. വിവാഹത്തിന്റെ ചിത്രങ്ങൾ ഓൺലൈനിൽ പുറത്തുവന്നെങ്കിലും മൈലി ഇതുവരെ സോഷ്യൽ മീഡിയയിലൂടെ ഔദ്യോഗികമായി വിവരങ്ങൾ പങ്കുവെച്ചിട്ടില്ല. ‘എന്റർടൈൻമെന്റ് ടുനൈറ്റ്’ റിപ്പോർട്ട് പ്രകാരം, മൈലിയുടെ അമ്മ ടിഷ് സൈറസും സഹോദരി നോഹ സൈറസും ചടങ്ങിൽ പങ്കെടുത്തിരുന്നു. വെളുത്ത പൂക്കൾ കൊണ്ട് അലങ്കരിച്ച കമാനത്തിന് കീഴിൽ, നീന്തൽക്കുളത്തിന് സമീപം വെച്ച് ഇരുവരും വിവാഹ പ്രതിജ്ഞകൾ കൈമാറുന്നതിന്റെ ദൃശ്യങ്ങൾ പുറത്തുവന്ന ഫോട്ടോകളിലുണ്ട്.
മനോഹരമായ വെളുത്ത വിവാഹ ഗൗൺ ധരിച്ച് വൈകാരികമായി കണ്ണീർ തുടയ്ക്കുന്ന മൈലിയെയും, കടലാസിൽ നോക്കി ഹൃദയസ്പർശിയായി സംസാരിക്കുന്ന മാക്സിനെയും ചിത്രങ്ങളിൽ കാണാം. വിവാഹത്തിന് തലേദിവസം അടുത്ത സുഹൃത്തുക്കൾക്കും കുടുംബാംഗങ്ങൾക്കുമായി ഇരുവരും റിഹേഴ്സൽ ഡിന്നർ ഒരുക്കിയിരുന്നു. ‘M+M’ എന്ന ഇനീഷ്യലുകൾ പതിപ്പിച്ച മെനുവിന്റെ ചിത്രം ഉൾപ്പെടെ ആഘോഷങ്ങളിൽ നിന്നുള്ള ദൃശ്യങ്ങൾ മൈലിയുടെ രണ്ടാനമ്മ ലില്ലി-റോസ് പർസെൽ ഇൻസ്റ്റാഗ്രാം സ്റ്റോറികളിലൂടെ പങ്കുവെച്ചിരുന്നു.
2021 ഡിസംബറിൽ മിയാമിയിൽ നടന്ന മൈലിയുടെ ന്യൂ ഇയർ ഈവ് സ്പെഷ്യൽ പരിപാടിയുടെ വേദിക്ക് പിന്നിൽ വെച്ചാണ് ഇരുവരും ആദ്യമായി അടുക്കുന്നത്. പിന്നീട് 2022 ഏപ്രിലിൽ വെസ്റ്റ് ഹോളിവുഡിൽ വെച്ച് ഇവർ ബന്ധം സ്ഥിരീകരിച്ചു. 2025 നവംബറിൽ ലോസ് ഏഞ്ചൽസിൽ നടന്ന ‘അവതാർ: ഫയർ ആൻഡ് ആഷ്’ പ്രീമിയറിനിടെ മൈലിയുടെ കൈയിലെ വജ്രമോതിരം ശ്രദ്ധിക്കപ്പെട്ടതോടെയാണ് വിവാഹനിശ്ചയ വാർത്തകൾ പ്രചരിച്ചത്. തുടർന്ന് ജീവിതത്തിലെ പുതിയ ഘട്ടത്തിൽ ഏറെ സന്തോഷവതിയാണെന്ന് വ്യക്തമാക്കി അവർ വിവാഹനിശ്ചയം സ്ഥിരീകരിക്കുകയായിരുന്നു.
കഴിഞ്ഞ വർഷം ജപ്പാനിലെ ക്യോട്ടോയിലേക്ക് നടത്തിയ യാത്രയ്ക്കിടെയാണ് വിവാഹാഭ്യർത്ഥന നടത്തിയതെന്ന് മാക്സ് നേരത്തെ വണ്ടർലാൻഡ് മാഗസിന് നൽകിയ അഭിമുഖത്തിൽ വെളിപ്പെടുത്തിയിരുന്നു. ആദ്യം ടോക്കിയോയിലും പിന്നീട് ക്യോട്ടോയിലും പോയെന്നും, യാത്രയുടെ അവസാന ദിവസത്തിന്റെ അവസാന നിമിഷം വരെ കാത്തിരുന്നാണ് പ്രൊപ്പോസ് ചെയ്തതെന്നും അദ്ദേഹം പറഞ്ഞിരുന്നു. നേരത്തെ നടൻ ലിയാം ഹെംസ്വർത്തുമായി വിവാഹിതയായിരുന്ന മൈലി, 2018 ഡിസംബറിൽ വിവാഹിതരാവുകയും 2019 ഓഗസ്റ്റിൽ വേർപിരിയുകയും ചെയ്തിരുന്നു. 2020 ജനുവരിയിലാണ് ഇരുവരുടെയും വിവാഹമോചനം നിയമപരമായി പൂർത്തിയായത്.




