‘കിഷ്കിന്ധാ കാണ്ഡം’, ‘എക്കോ’ എന്നീ ശ്രദ്ധേയ ചിത്രങ്ങളുടെ സംവിധായകന് ദിന്ജിത്ത് അയ്യത്താനും കുഞ്ചാക്കോ ബോബനും കൈകോര്ക്കുന്ന പുതിയ മലയാള ചിത്രം പനോരമ സ്റ്റുഡിയോസ് പ്രഖ്യാപിച്ചു. അഭിജിത്ത് കാഞ്ഞിരത്തിങ്കല് സംവിധാനം ചെയ്യുന്ന ഈ ഫാമിലി ഡ്രാമ ത്രില്ലര്, ‘ഉന്മാദം’ എന്ന ചിത്രത്തിന് ശേഷം പനോരമ സ്റ്റുഡിയോസും കുഞ്ചാക്കോ ബോബനും ഒന്നിക്കുന്ന രണ്ടാമത്തെ പ്രൊജക്റ്റാണ്.കുമാര് മങ്കത് പഥക്, അഭിഷേക് പഥക് എന്നിവര് ചേര്ന്ന് നിര്മ്മിക്കുന്ന ചിത്രത്തില് ദിന്ജിത്ത് അയ്യത്താന് നിര്മ്മാതാവായും ക്രിയേറ്റീവ് ഡയറക്ടറായും പ്രവര്ത്തിക്കുന്നു. മിസ്റ്ററി ത്രില്ലറായ ‘കിഷ്കിന്ധാ കാണ്ഡം’, സൈക്കോളജിക്കല് ക്രൈം ത്രില്ലറായ ‘എക്കോ’ എന്നീ ചിത്രങ്ങളിലൂടെ നിരൂപക പ്രശംസ നേടിയ സംവിധായകനാണ് ദിന്ജിത്ത് അയ്യത്താന്. ഈ ചിത്രങ്ങളില് അസോസിയേറ്റ് ഡയറക്ടറായി ആയി അഭിജിത്ത് കാഞ്ഞിരത്തിങ്കല് പ്രവര്ത്തിച്ചിട്ടുണ്ട്. 2027 മെയ് മാസത്തോടെ ചിത്രത്തിന്റെ ഷൂട്ടിംഗ് ആരംഭിക്കും.
പ്രാദേശിക സിനിമാ മേഖലകളിലേക്കുള്ള തങ്ങളുടെ പ്രവര്ത്തനം കൂടുതല് വിപുലമാക്കുന്നതിന്റെ ഭാഗമായാണ് പനോരമ സ്റ്റുഡിയോസ് മലയാള സിനിമയില് വീണ്ടും ചുവടുറപ്പിക്കുന്നത്. നിരൂപക പ്രശംസയും വാണിജ്യ വിജയവും നേടിയ നിരവധി ചിത്രങ്ങളിലൂടെ ഇന്ത്യയിലെ മുന്നിര സിനിമാ നിര്മ്മാണ കമ്പനികളിലൊന്നായി പനോരമ സ്റ്റുഡിയോസ് മാറിക്കഴിഞ്ഞു. ഓംകാര, സ്പെഷ്യല് 26, പ്യാര് കാ പഞ്ച്നാമ, റെയ്ഡ്, ശൈത്താന്, വന് വിജയമായ ദൃശ്യം ഫ്രാഞ്ചൈസി എന്നിവ പനോരമ സ്റ്റുഡിയോസിന്റെ ശ്രദ്ധേയമായ ചിത്രങ്ങളില് ചിലതാണ്. ഇവരുടെ ചിത്രങ്ങള് ഇതിനോടകം 55-ലധികം പ്രമുഖ പുരസ്കാരങ്ങള് സ്വന്തമാക്കിയിട്ടുണ്ട്.
പനോരമ സ്റ്റുഡിയോസ് അവതരിപ്പിക്കുന്ന ഈ ചിത്രത്തിന്റെ നിര്മ്മാണം കുമാര് മങ്കത് പഥക്, അഭിഷേക് പഥക് എന്നിവര്ക്കൊപ്പം ദിന്ജിത്ത് അയ്യത്താനും ചേര്ന്നാണ് നിര്വ്വഹിക്കുന്നത്. രാജേഷ് മേനോനാണ് സഹനിര്മ്മാതാവ്. അഭിനവ് മെഹ്റോത്ര ക്രിയേറ്റീവ് പ്രൊഡ്യൂസറായും പ്രവര്ത്തിക്കുന്നു. ശ്യാം ഭാസ്കരന്, അഖില് നടുമന എന്നിവര് ചേര്ന്നാണ് ചിത്രത്തിന് തിരക്കഥയൊരുക്കുന്നത്. ചിത്രത്തെക്കുറിച്ചുള്ള കൂടുതല് വിവരങ്ങള് വരും ദിവസങ്ങളില് പുറത്തുവിടും. വാര്ത്താ പ്രചരണം: അപര്ണ ഗിരീഷ്.




