നിതേഷ് തിവാരിയുടെ സംവിധാനത്തിൽ ഒരുങ്ങിയ ബ്രഹ്മാണ്ഡ ചിത്രം ‘രാമായണം’ തിയേറ്ററുകളിൽ ചരിത്രം സൃഷ്ടിച്ച് മുന്നേറുകയാണ്. രാമനായി രൺബീർ കപൂറും, രാവണനായി യഷും, സീതയായി സായ് പല്ലവിയും എത്തിയ ഈ ഇതിഹാസ ചിത്രം ബോക്സ് ഓഫീസിൽ വൻ കുതിപ്പാണ് നടത്തുന്നത്. റിലീസ് ചെയ്തതുമുതൽ തിയേറ്ററുകളിൽ വലിയ തരംഗം സൃഷ്ടിച്ച ചിത്രം ഇതിനോടകം തന്നെ ആഗോളതലത്തിൽ 823.50 കോടി രൂപയുടെ കളക്ഷൻ നേടി പുതിയ റെക്കോർഡുകൾ സ്വന്തമാക്കിക്കഴിഞ്ഞു. നമിത് മൽഹോത്രയുടെ പ്രൈം ഫോക്കസ് സ്റ്റുഡിയോസ്, ഡിഎൻഇജി, യഷിന്‍റെ മോൺസ്റ്റർ മൈൻഡ് ക്രിയേഷൻസ് എന്നിവർ ചേർന്ന് നിർമ്മിച്ച ഈ ചിത്രം മലയാളം, ഹിന്ദി, കന്നഡ, തെലുങ്ക്, തമിഴ് എന്നീ അഞ്ച് ഭാഷകളിലാണ് റിലീസ് ചെയ്തിരിക്കുന്നത്.
ഇന്ത്യൻ സിനിമ ഇതുവരെ കണ്ടിട്ടുള്ളതിൽവെച്ച് ഏറ്റവും വലിയ താരനിരയാണ് ഈ ചിത്രത്തിനായി അണിനിരന്നിരിക്കുന്നത്. ശോഭന കൈകേയിയായും, അരുൺ ഗോവിൽ ദശരഥ മഹാരാജാവായും വേഷമിടുന്നു എന്നത് ചിത്രത്തിൻ്റെ മാറ്റ് കൂട്ടുന്നു. രവി ദുബെ (ലക്ഷ്മണൻ), രാകുൽ പ്രീത് സിംഗ് (ശൂർപ്പണഖ), കുനാൽ കപൂർ തുടങ്ങിയ പ്രമുഖരും ചിത്രത്തിലുണ്ട്.ഓസ്കർ ജേതാക്കളായ ഹാൻസ് സിമ്മറും എ.ആർ. റഹ്മാനും ആദ്യമായി സംഗീതത്തിലൂടെ ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്. എട്ട് തവണ ഓസ്കർ പുരസ്കാരം നേടിയ ഡിഎൻഇജി സ്റ്റുഡിയോയാണ് ചിത്രത്തിൻ്റെ വിഷ്വൽ എഫക്റ്റ്സ് കൈകാര്യം ചെയ്തിരിക്കുന്നത്. രണ്ട് ഭാഗങ്ങളായി പുറത്തിറങ്ങുന്ന ഈ ബിഗ് ബജറ്റ് ചിത്രത്തിൻ്റെ ആദ്യ ഭാഗം ഇന്ത്യൻ സിനിമയുടെ ചരിത്രത്തിലെ തന്നെ ഏറ്റവും വലിയ വിജയങ്ങളിലൊന്നായാണ് വിലയിരുത്തപ്പെടുന്നത്.
