ഏഷ്യയിലെ ഏറ്റവും വലിയ ചലച്ചിത്രമേളകളിലൊന്നായ ദക്ഷിണ കൊറിയയിലെ ബുസാന്‍ അന്താരാഷ്ട്ര ചലച്ചിത്രമേളയുടെ 31-ാമത് പതിപ്പില്‍ ശ്രദ്ധാകേന്ദ്രമായി മലയാളത്തിന്റെ ശ്രദ്ധേയ സംവിധായകനും നടനുമായ ദിലീഷ് പോത്തന്‍. ലിയോ തദേവൂസ് സംവിധാനം ചെയ്ത ‘ചെവിട്ടോര്‍മ്മ’ എന്ന ചിത്രത്തിന്റെ വേള്‍ഡ് പ്രീമിയറിനായാണ് ദിലീഷ് പോത്തന്‍ ബുസാനിലെത്തിയത്. മേളയിലെ പ്രശസ്തമായ ‘എ വിന്‍ഡോ ഓണ്‍ ഏഷ്യന്‍ സിനിമ’ എന്ന വിഭാഗത്തിലാണ് ചിത്രം പ്രദര്‍ശിപ്പിക്കുന്നത്. ചലച്ചിത്രമേളയുടെ റെഡ് കാര്‍പ്പറ്റില്‍ മലയാളി തനിമയുള്ള പരമ്പരാഗത വേഷത്തില്‍ ദിലീഷ് പോത്തനും സിനിമയുടെ മറ്റ് അണിയറപ്രവര്‍ത്തകരും എത്തിച്ചേര്‍ന്നത് ഏറെ ശ്രദ്ധേയമായി. തന്റെ യഥാര്‍ത്ഥ പ്രായത്തേക്കാള്‍ ഇരട്ടി പ്രായമുള്ള, മരണക്കിടക്കയിലായ ‘വര്‍ക്കിച്ചന്‍’ എന്ന കഥാപാത്രത്തെയാണ് ചിത്രത്തില്‍ ദിലീഷ് പോത്തന്‍ അവതരിപ്പിക്കുന്നത്. പൗളി വത്സനാണ് ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിച്ചിരിക്കുന്നത്. കേരളത്തിലെ മലയോര മേഖലയുടെ പശ്ചാത്തലത്തില്‍ മരണം, വിശ്വാസം, ഓര്‍മ്മകള്‍ എന്നിവയെ ആസ്പദമാക്കി ഒരുക്കിയ ഒരു മെഡിറ്റേറ്റീവ് ഡ്രാമയാണ് ‘ചെവിട്ടോര്‍മ്മ’.
മരിക്കാന്‍ കിടക്കുന്ന വര്‍ക്കിച്ചന്റെ അവസാന നിമിഷങ്ങളില്‍ പ്രാര്‍ത്ഥനകള്‍ ചൊല്ലിക്കൊടുക്കാന്‍ എത്തുന്ന ‘ത്രേസ്യ’ എന്ന കഥാപാത്രമായാണ് പൗളി വത്സന്‍ എത്തുന്നത്. വര്‍ക്കിച്ചന്റെ മരണത്തിനായി കാത്തിരിക്കുന്ന കുടുംബാംഗങ്ങള്‍ക്കിടയിലെ പഴയകാല വൈരങ്ങളും ബന്ധങ്ങളുടെ സങ്കീര്‍ണ്ണതകളുമാണ് ചിത്രത്തിന്റെ പ്രമേയം. ലോകത്തിന്റെ വിവിധ ഭാഗങ്ങളില്‍ നിന്നുമെത്തിയ ആയിരക്കണക്കിന് ചലച്ചിത്രപ്രേമികളെയും അന്താരാഷ്ട്ര മാധ്യമങ്ങളെയും സാക്ഷിനിര്‍ത്തിയാണ് മലയാളത്തിന്റെ ഈ അഭിമാന ചിത്രം ശ്രദ്ധാകേന്ദ്രമായത്. മുന്‍പ് സംവിധായകനായി പല അന്താരാഷ്ട്ര മേളകളുടെയും ഭാഗമായിട്ടുള്ള ദിലീഷ് പോത്തന്‍, ഇപ്പോള്‍ അഭിനേതാവായും ഇത്തരം വേദികളില്‍ ശോഭിക്കുന്നത് മലയാള സിനിമയ്ക്ക് തന്നെ ഇരട്ടി മധുരമായിരിക്കുകയാണ്. ഈയടുത്ത് പുറത്തിറങ്ങിയ ചെവിട്ടോര്‍മ്മ ടീസറില്‍ ദിലീഷ് പോത്തന്റെ വ്യത്യസ്തമായ ലുക്കും പ്രകടനവും സോഷ്യല്‍ മീഡിയയില്‍ ഏറെ ചര്‍ച്ചയായിരുന്നു.
ചിത്രത്തിന്റെ ബുസാന്‍ പ്രീമിയറുമായി ബന്ധപ്പെട്ട് ദ ഹോളിവുഡ് റിപ്പോര്‍ട്ടര്‍ ഇന്ത്യയ്ക്ക് നല്‍കിയ പ്രത്യേക അഭിമുഖത്തില്‍, തന്റെ അഭിനയ ജീവിതത്തെക്കുറിച്ചും കഥാപാത്രത്തിനായുള്ള തയ്യാറെടുപ്പുകളെക്കുറിച്ചും ദിലീഷ് പോത്തന്‍ മനസ്സ് തുറന്നു. ഇപ്പോഴും എന്നെ ഒരു സംവിധായകനായി കാണാനാണ് ഞാന്‍ ആഗ്രഹിക്കുന്നത്. സംവിധാനം മാത്രമായിരുന്നു എന്റെ എപ്പോഴത്തെയും ലക്ഷ്യം. അഭിനയിച്ച വേഷങ്ങളെല്ലാം തന്നെ അഭിനയിക്കാനുള്ള ചില ശ്രമങ്ങളായാണ് എനിക്ക് തോന്നുന്നത്,’ എന്ന് ദിലീഷ് പോത്തന്‍ പറയുകയുണ്ടായി. ആദ്യകാലങ്ങളില്‍ സാമ്പത്തിക പ്രതിസന്ധികള്‍ നേരിട്ടപ്പോള്‍ ജീവനോപാധിയായാണ് അഭിനയത്തിലേക്ക് എത്തിയതെന്ന് അദ്ദേഹം ഓര്‍ത്തെടുത്തു. അസിസ്റ്റന്റ് ഡയറക്ടറായി പ്രവര്‍ത്തിക്കുന്ന കാലത്ത് ‘സാള്‍ട്ട് എന്‍ പേപ്പര്‍’ എന്ന ചിത്രത്തിലെ ചെറിയ വേഷത്തിലൂടെയാണ് അഭിനയ രംഗത്തേക്ക് വരുന്നത്. പിന്നീട് വരുമാനമാര്‍ഗ്ഗമായി കൂടുതല്‍ വേഷങ്ങള്‍ ചെയ്യുകയും ക്രമേണ അഭിനയം ആസ്വദിച്ചു തുടങ്ങുകയുമായിരുന്നു. എങ്കിലും സിനിമകളെയും കഥാപാത്രങ്ങളെയും അടുത്തറിയാനും പഠിക്കാനുമുള്ള അവസരമായാണ് അദ്ദേഹം അഭിനയത്തെ കാണുന്നത്.
ചെവിട്ടോര്‍മ്മയില്‍ മരണക്കിടക്കയിലായ വര്‍ക്കിച്ചന്റെ കഥാപാത്രത്തെ ഉള്‍ക്കൊള്ളാന്‍ തനിക്ക് വലിയ തരത്തിലുള്ള മാനസിക തയ്യാറെടുപ്പുകള്‍ വേണ്ടിവന്നതായും ദിലീഷ് പോത്തന്‍ പറഞ്ഞു. ‘ജീവിതത്തില്‍ മരണത്തെ ഏറ്റവും അടുത്തറിഞ്ഞത് എന്റെ മുത്തശ്ശന്‍ മരിച്ചപ്പോഴാണ്. അദ്ദേഹത്തിന്റെ അവസാന നിമിഷങ്ങളില്‍ ഞാന്‍ കൂടെയുണ്ടായിരുന്നു. ആ അനുഭവങ്ങളും ചുറ്റും കണ്ടിട്ടുള്ള പല രോഗികളുടേയും മാനസികാവസ്ഥയും മനസ്സില്‍ ധ്യാനിച്ചാണ് വര്‍ക്കിച്ചന്റെ മാനസികാവസ്ഥയിലേക്ക് ഞാന്‍ എത്തിയത്.’, അദ്ദേഹം പറഞ്ഞു. ‘റൊണെക്‌സ് സേവ്യര്‍ ചെയ്ത മേക്കപ്പ് എന്നെ കഥാപാത്രത്തിലേക്ക് പൂര്‍ണ്ണമായി മാറ്റാന്‍ സഹായിച്ചു. കൂടാതെ പൗളി ചേച്ചിയുമൊന്നിച്ചുള്ള രംഗങ്ങളില്‍ അവരുടെ പ്രകടനം വലിയ പിന്തുണയായ്.’, ദിലീഷ് പോത്തന്റെ വാക്കുകള്‍.
