അഹാന കൃഷ്ണ-നിമിഷ രവി വിവാഹ ചടങ്ങുകൾക്ക് കാർമികത്വം വഹിച്ച് ദുൽഖർ സൽമാൻ. രണ്ടു പേരേയും ദമ്പതിമാരായി ദുൽഖർ പ്രഖ്യാപിക്കുന്നതും വധുവിനെ ഇനി ചുംബിക്കാം എന്നുപറയുന്നതുമെല്ലാം വിഡിയോയിൽ കാണാം. അഹാന തന്നെയാണ് തന്റെ സോഷ്യൽ മീഡിയ അക്കൗണ്ടിൽ വിവാഹ വീഡിയോ പങ്കുവെച്ചത്. ‘അവനും ഞാനും, നമ്മുടെ ജീവിതമെന്ന മനോഹരമായ മരവും 13.09.2026 – എന്റെ സ്വപ്നങ്ങളിൽ കണ്ടതുപോലെ തന്നെ സംഭവിച്ച ഒരു ദിവസം! പ്രപഞ്ചമേ, നന്ദി. എന്റെ പ്രിയപ്പെട്ട ഗോവിന്ദ് വസന്ത, ‘തോന്നൽ’ സംഗീതത്തിന്റെ വെഡ്ഡിംഗ് വേർഷൻ ഒരുക്കി നൽകിയതിന് നന്ദി. അഞ്ചു വർഷം മുൻപ് നിങ്ങൾ എനിക്ക് ഇതിന്റെ റഫ് ട്രാക്ക് അയച്ചു തന്ന ആ നിമിഷം തന്നെ ഞാൻ ഉറപ്പിച്ചിരുന്നു, എന്റെ വിവാഹ വിഡിയോയുടെ പശ്ചാത്തല സംഗീതം ഇതായിരിക്കുമെന്ന്’, അഹാന കുറിച്ചു.
തന്റെ മനസ്സിലുള്ള ആശയം തുറന്നു പറയുന്നതിന് മുൻപ് തന്നെ, സ്റ്റേജിൽ ഒരു മരം നിർമ്മിക്കുന്നതിനെക്കുറിച്ച് ഡെക്കോർ ടീം അവതരിപ്പിച്ചത് അഹാനയെ അമ്പരപ്പിച്ചു. റെഡ് ഡോട്ട് ഇവന്റ്സ് ആണ് മനോഹരമായ ഈ ആശയം പൂർണതയിലെത്തിച്ചത്. മരത്തിന്റെ സൂക്ഷ്മമായ രൂപകൽപ്പനയും അതിനുചുറ്റുമുള്ള അലങ്കാരങ്ങളും അഹാന ആഗ്രഹിച്ചതിനേക്കാൾ മനോഹരമായി അവർ സാക്ഷാത്കരിച്ചു. വിവാഹ വിഡിയോയ്ക്കൊപ്പമാണ് തന്റെ വിവാഹം സ്വപ്നതുല്യമാക്കി തീർത്തവരോട് അഹാന നന്ദി പറഞ്ഞിരിക്കുന്നത്.
