ദുല്ഖര് സല്മാനെ നായകനാക്കി നഹാസ് ഹിദായത്ത് സംവിധാനം ചെയ്യുന്ന ‘ഐ ആം ഗെയിം’ വലിയ പ്രതീക്ഷകളോടെയാണ് തിയേറ്ററുകളിലേക്ക് എത്തുന്നത്. ആരാധകരും സിനിമാ പ്രേമികളും ഏറെ ആവേശത്തോടെ കാത്തിരിക്കുന്ന ചിത്രം സെപ്റ്റംബര് 3 ന് ആഗോള റിലീസായി തിയേറ്ററുകളിലെത്തും. കഴിഞ്ഞ ദിവസമാണ് ചിത്രത്തിന്റെ പ്രീ റിലീസ് ഇവന്റും മ്യൂസിക് ലോഞ്ചും നടന്നത്. പ്രീ റിലീസ് ഇവന്റ് വേദിയില് വെച്ച്, ചിത്രത്തിന്റെ പേരിനെ കുറിച്ചും സംവിധായകന് നഹാസ് ഹിദായത്തിനെക്കുറിച്ചും സംഗീത സംവിധായകന് ജേക്ക്സ് ബിജോയ് പറഞ്ഞ വാക്കുകള് ആണ് ഇപ്പോള് ശ്രദ്ധ നേടുന്നത്. ഏത് പ്രതിസന്ധികളെയും തരണം ചെയ്യാന് തയ്യാറായ, എന്തിനേയും നേരിടാന് തയ്യാറായ ആള് എന്ന അര്ഥമാണ് ‘ഐ ആം ഗെയിം’ എന്ന വാക്ക് കൊണ്ട് ഉദ്ദേശിക്കുന്നത് എന്ന് ജേക്സ് പറഞ്ഞു.
ഐ ആം ഗെയിം എന്ന ടൈറ്റിലിന് ഏറ്റവും ഉചിതമായ വ്യക്തിയാണ് നഹാസ് ഹിദായത്ത് എന്നും ഒരു വ്യക്തിക്ക് എന്തൊക്കെ ബുദ്ധിമുട്ടുകള് സഹിക്കാന് പറ്റുമോ, അതൊക്കെ സഹിച്ച വ്യക്തിയാണ് നഹാസ് എന്നുമാണ് ജേക്സ് ബിജോയ് പറഞ്ഞത്. സിനിമയില് തന്റേതായ ഒരിടം കണ്ടെത്താന് നഹാസ് നടത്തിയ പരിശ്രമങ്ങളെയും അദ്ദേഹം നേരിട്ട ബുദ്ധിമുട്ടുകളെയും സൂചിപ്പിക്കുന്നതാണ് ജേക്സ് പറഞ്ഞ വാക്കുകള്. നഹാസ് സംവിധാന സഹായി ആയി ജോലി ചെയ്യുന്ന കാലം മുതല് തനിക്ക് അദ്ദേഹത്തെ അറിയാം എന്നും, 10 വര്ഷത്തോളം നീണ്ട ആ പരിചയത്തില്, സിനിമാ ജീവിതത്തിലും വ്യക്തി ജീവിതത്തിലും നഹാസ് നേരിട്ട വെല്ലുവിളികളും അദ്ദേഹം അതിനെ എങ്ങനെയാണ് തരണം ചെയ്തത് എന്നും അടുത്ത് നിന്ന് കാണാന് സാധിച്ച സുഹൃത്താണ് താനെന്നും ജേക്സ് ബിജോയ് പറഞ്ഞു. ആര്ഡിഎക്സ് എന്ന നഹാസിന്റെ ആദ്യ ചിത്രം നേടിയ വിജയം ഏറെ അഭിമാനത്തോടെയാണ് താന് നോക്കി കണ്ടതെന്നും ജേക്സ് പറയുന്നു.
ആദ്യ ചിത്രം ഒരുക്കുന്നതിനായി നഹാസ് നടത്തിയ പരിശ്രമവും അത് മുടങ്ങി പോയതും, ശേഷം വ്യക്തിജീവിതത്തില് അച്ഛന്റെ വിയോഗം ഉണ്ടാക്കിയ വേദനയും എല്ലാം തരണം ചെയ്താണ് നഹാസ് ‘ആര്ഡിഎക്സ്’ എന്ന വലിയ ഹിറ്റ് ഒരുക്കിയത് എന്ന് ജേക്സ് പറഞ്ഞു. ഐ ആം ഗെയിമിന്റെ കഥ രണ്ടര വര്ഷം മുമ്പ് കേള്ക്കുമ്പോള് മുതല് താന് ആവേശഭരിതനാണ് എന്നും ജേക്സ് ബിജോയ് വെളിപ്പെടുത്തി. താനും നഹാസും അടുത്തടുത്ത നാട്ടില് ഉള്ളവരാണ് എന്നും ജേക്സ് പറഞ്ഞു. ദുല്ഖര് സല്മാന്റെ കരിയറിലെ ഏറ്റവും വലിയ ചിത്രങ്ങളിലൊന്നായി ഒരുങ്ങുന്ന ‘ഐ ആം ഗെയിം’ ഒരു ബിഗ് ബഡ്ജറ്റ് ഫാന്റസി ത്രില്ലറാണ്. വേഫെറര് ഫിലിംസിന്റെ ബാനറില് ദുല്ഖര് സല്മാനും ജോം വര്ഗീസും ചേര്ന്നാണ് ചിത്രം നിര്മ്മിക്കുന്നത്. സജീര് ബാബ, ഇസ്മായില് അബൂബക്കര്, ബിലാല് മൊയ്ദു എന്നിവര് ചേര്ന്നാണ് തിരക്കഥ ഒരുക്കിയത്. സജീര് ബാബ, ആദര്ശ് സുകുമാരന്, ഷബാസ് റഷീദ് എന്നിവര് ചേര്ന്നാണ് സംഭാഷണങ്ങള് രചിച്ചിരിക്കുന്നത്.
കഴിഞ്ഞ ദിവസം നടന്ന ചിത്രത്തിന്റെ പ്രീ റിലീസ്/മ്യൂസിക് ലോഞ്ച് ഇവന്റും വലിയ ആഘോഷമായിരുന്നു. കാക്കനാട് കിന്ഫ്ര ഇന്റര്നാഷണല് എക്സിബിഷന് സെന്ററില് പതിനായിരക്കണക്കിന് ആരാധകരുടെ സാന്നിധ്യത്തിലാണ് പരിപാടി നടന്നത്. ജേക്സ് ബിജോയ് ഉള്പ്പെടെയുള്ള സംഗീതസംഘവും വേടന്, അര്മാന് മാലിക് തുടങ്ങിയ ഗായകരും ഇവന്റ് വേദിയില് പ്രകടനങ്ങളുമായി തിളങ്ങി. ചിത്രത്തിലെ ‘ലൂസര്’, ‘മഴവില്ലായെ ‘ എന്നീ ഗാനങ്ങള് ഇതിനോടകം ശ്രദ്ധ നേടിയിട്ടുണ്ട്. ദുല്ഖര് സല്മാന് തന്നെയാണ് ‘ ലൂസര്’ ഗാനം ആലപിച്ചിരിക്കുന്നത്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലായി പാന് ഇന്ത്യന് റിലീസായാണ് ചിത്രം എത്തുന്നത്. ദുല്ഖര് സല്മാന്റെ 40-ാമത്തെ ചിത്രം കൂടിയാണിത്. ചിത്രത്തിന്റെ ട്രെയിലറിനും വമ്പന് പ്രതികരണം ആണ് ലഭിച്ചത്. ത്രസിപ്പിക്കുന്ന തീയേറ്റര് അനുഭവമാണ് പ്രേക്ഷകരെ കാത്തിരിക്കുന്നത് എന്ന സൂചനയാണ് ട്രെയ്ലര് നല്കിയത്. ആന്റണി വര്ഗീസ്, മിഷ്കിന്, കായദു ലോഹര്, കതിര്, പാര്ത്ഥ് തിവാരി, സംയുക്ത വിശ്വനാഥന് തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങള്.
