സ്വന്തം സിനിമകൾ കണ്ട് ആസ്വദിക്കാൻ സാധിക്കാറില്ലെന്ന് സംവിധായകൻ ഗിരീഷ് എ.ഡി. സിനിമകൾ കാണുമ്പോൾ ഇതൊരുപക്ഷേ ഇതിലും മികച്ച രീതിയിൽ എഴുതാമായിരുന്നുവെന്നും വേറെ രീതിയിൽ ചെയ്യാമായിരുന്നുവെന്നും തോന്നാറുണ്ടെന്ന് സംവിധായകൻ പറഞ്ഞു. തന്റെ ചിത്രങ്ങളിൽ ‘സൂപ്പർ ശരണ്യ’ യാണ് ഒട്ടും കണ്ടിരിക്കാൻ പറ്റാത്തതെന്നും ഗിരീഷ് പറഞ്ഞു.”സൂപ്പർ ശരണ്യ എനിക്ക് കണ്ടിരിക്കാൻ പറ്റില്ല. ബാക്കി എല്ലാ പടങ്ങളും കണ്ടിരിക്കാം, പക്ഷേ ഇതുമാത്രം പറ്റില്ല. ആ സിനിമയുടെ റൈറ്റിങ്ങിൽ ഒരുപാട് പ്രശ്നങ്ങൾ ഉണ്ടായിരുന്നു. സ്ക്രിപ്റ്റ് റിവ്യൂ ചെയ്തിരുന്നില്ല. കോവിഡ് കാലത്തെ ബുദ്ധിമുട്ടുകൾക്കിടയിൽ എടിപിടിയായി ഷൂട്ട് ചെയ്ത പടമാണ് അത്. അതിന്റേതായ എല്ലാ പ്രശ്നങ്ങളും ആ സിനിമയ്ക്കുണ്ട്. ഒരുപാട് കോമഡി സീനുകൾ ഉണ്ടെങ്കിലും എനിക്ക് ഒട്ടും സംതൃപ്തി തരാത്ത ചിത്രമാണത്. നല്ല പൊട്ടൻഷ്യൽ ഉള്ള കഥയായിരുന്നിട്ടും അതിന്റെ പകുതിയിൽ പോലും എത്തുവാൻ സാധിച്ചില്ല. അതുകൊണ്ടുതന്നെ അതിൽ എപ്പോഴും വലിയൊരു നിരാശയുണ്ട്,” ഗിരീഷ് എ.ഡി. വ്യക്തമാക്കി.
അതേസമയം, തന്റെ സിനിമകളെക്കുറിച്ച് ആലോചിക്കുമ്പോൾ ഏറ്റവും സന്തോഷം തരുന്ന രംഗം ‘പ്രേമലു’വിലേതാണെന്നും അദ്ദേഹം കൂട്ടിച്ചേർത്തു. ചിത്രത്തിൽ കാർ ചേസ് ചെയ്യുന്നതിനിടയിൽ നായിക പ്രൊപ്പോസ് ചെയ്യുന്ന സീനാണ് തന്റെ ഏറ്റവും പ്രിയപ്പെട്ട രംഗമെന്നും ഗിരീഷ് പറഞ്ഞു. 2022ല് ഗിരീഷ് എ ഡി ഒരുക്കിയ ചിത്രമാണ് സൂപ്പർ ശരണ്യ. അർജുൻ അശോകൻ, അനശ്വര രാജൻ, മമിത ബൈജു എന്നിവരായിരുന്നു സിനിമയിൽ പ്രധാന കഥാപാത്രങ്ങളെ അവതരിപ്പിച്ചത്. സിനിമ മികച്ച പ്രതികരണമായിരുന്നു നേടിയിരുന്നത്.
