ആരാധകർ ഏറെ ആകാംക്ഷയോടെ കാത്തിരിക്കുന്ന മോഹൻലാൽ ചിത്രം ‘ദൃശ്യം 3’യുടെ ബുക്കിംഗ് ആരംഭിച്ചു. ജീത്തു ജോസഫ് സംവിധാനം ചെയ്യുന്ന ഈ ചിത്രം മോഹൻലാലിന്റെ ജന്മദിനമായ മെയ് 21-നാണ് തിയേറ്ററുകളിൽ എത്തുന്നത്. കഴിഞ്ഞ ദിവസം പുറത്തിറങ്ങിയ ചിത്രത്തിന്റെ ട്രെയിലർ മികച്ച പ്രതികരണമാണ് നേടുന്നത്. കുടുംബത്തെ രക്ഷിക്കാൻ ജോർജുകുട്ടി നടത്തുന്ന നീക്കങ്ങളും ഇത്തവണ അദ്ദേഹം നേരിടുന്ന വെല്ലുവിളികളും ട്രെയിലറിൽ സൂചിപ്പിക്കുന്നുണ്ട്. ബോക്സ് ഓഫീസ് റെക്കോർഡുകൾ തിരുത്തിക്കുറിച്ച മുൻ ഭാഗങ്ങൾ പോലെ തന്നെ മൂന്നാം ഭാഗവും വലിയ വിജയമാകുമെന്നാണ് വിലയിരുത്തൽ.
യു/എ സർട്ടിഫിക്കറ്റ് ലഭിച്ച ചിത്രം ഏപ്രിൽ മാസത്തിൽ റിലീസ് ചെയ്യാനാണ് ആദ്യം നിശ്ചയിച്ചിരുന്നതെങ്കിലും പശ്ചിമേഷ്യൻ രാഷ്ട്രീയ സാഹചര്യങ്ങൾ പരിഗണിച്ച് മെയ് മാസത്തിലേക്ക് മാറ്റുകയായിരുന്നു. മീന, അൻസിബ ഹസൻ, എസ്തർ അനിൽ, ആശാ ശരത്, സിദ്ധിഖ് തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിച്ചിരിക്കുന്നത്. മലയാളത്തിന് പുറമെ ചിത്രത്തിന്റെ ഹിന്ദി പതിപ്പ് 2026 ഒക്ടോബർ രണ്ടിന് റിലീസ് ചെയ്യാനാണ് പനോരമ സ്റ്റുഡിയോസ് തീരുമാനിച്ചിരിക്കുന്നത്.
മലയാള സിനിമയിൽ ആദ്യമായി 50 കോടി ക്ലബ്ബിൽ ഇടംപിടിച്ച ‘ദൃശ്യം’ പരമ്പരയുടെ ഈ പുതിയ ഭാഗത്തിൽ ബോളിവുഡ് ബാനറായ പെൻ സ്റ്റുഡിയോസും വലിയ നിക്ഷേപം നടത്തിയിട്ടുണ്ട്. ഡിജിറ്റൽ റൈറ്റുകൾ ഉൾപ്പെടെ വലിയ തുകയ്ക്കാണ് വിറ്റുപോയിരിക്കുന്നത്. തെന്നിന്ത്യൻ സിനിമയും ബോളിവുഡും ഒരുപോലെ ഉറ്റുനോക്കുന്ന ഒരു റിലീസായി ദൃശ്യം 3 മാറിയിരിക്കുകയാണ്. ജോർജുകുട്ടിയുടെ ബുദ്ധിപരമായ നീക്കങ്ങൾ വീണ്ടും വെള്ളിത്തിരയിൽ കാണാൻ കാത്തിരിക്കുന്ന പ്രേക്ഷകർക്ക് ഈ മെയ് 21 വലിയൊരു ആഘോഷമായിരിക്കും.
