ബോളിവുഡിലെ ഏറ്റവും ധനികനായ താരങ്ങളിൽ ഒരാളായി മാറി ഷാരൂഖ് ഖാൻ. ഹുറുൺ ഗ്ലോബൽ റിച്ച് ലിസ്റ്റിൽ ആണ് ഷാരൂഖ് ഇപ്പോൾ ഇടം പിടിച്ചിരിക്കുന്നത്. സിനിമയ്ക്ക് അപ്പുറം ബിസിനസ് മേഖലയിലേക്കും തന്റെ സ്വാധീനം വ്യാപിപ്പിച്ചുകൊണ്ട്, ലോകത്തിലെ ഏറ്റവും ധനികരായ വ്യക്തികളിൽ തന്റെ സ്ഥാനം ഷാരൂഖ് ഇതിടെ ഷാരൂഖ് ഉറപ്പിച്ചു. പട്ടിക പ്രകാരം, ഷാരൂഖ് ഖാന്റെ ആസ്തി ഏകദേശം 1.3 ബില്യൺ ഡോളറാണ് (ഏകദേശം 10,800 കോടി രൂപ). ഇത് അദ്ദേഹത്തെ ലോകത്തിലെ തന്നെ ഏറ്റവും ധനികരായ അഭിനേതാക്കളിലൊരാളാക്കി മാറ്റി. ജനുവരി 15 വരെയുള്ള കണക്കുകൾ അനുസരിച്ചാണ് പട്ടിക തയ്യാറാക്കിയിരിക്കുന്നത്. ഷാരൂഖ് വീണ്ടും പട്ടികയിൽ ഇടം നേടിയിട്ടുണ്ടെങ്കിലും, ഇത്തവണ അദ്ദേഹത്തിന്റെ സമ്പത്തിൽ നേരിയ കുറവുണ്ടായിട്ടുണ്ട്. കഴിഞ്ഞ വർഷം അദ്ദേഹത്തിന്റെ ആസ്തി 12,490 കോടി രൂപയായിരുന്നു, അതായത് ഏകദേശം 1.4 ബില്യൺ ഡോളർ.
കഴിഞ്ഞവർഷം, ഷാരൂഖിന്റെ ആസ്തി ഏകദേശം 1.3 ബില്യൺ ഡോളർ ആസ്തിയുള്ള ടെയ്ലർ സ്വിഫ്റ്റിനെ മറികടന്നു. എന്നാൽ, ഈ വർഷം ടെയ്ലർ സ്വിഫ്റ്റ് ഷാരൂഖിനെക്കാൾ മുന്നിലാണ്. രൺബീർ കപൂർ നായകനാവുന്ന ‘രാമായണ’ സിനിമയുടെ നിർമാതാവ് നമിത് മൽഹോത്രയും പട്ടികയിലിടം പിടിച്ചു. ഒരു ബില്യൺ ഡോളർ (9,204 കോടി രൂപ) ആസ്തിയാണ് അദ്ദേഹത്തിനുള്ളത്. അതേസമയം, 9.8 ലക്ഷം കോടി രൂപയുടെ ആസ്തിയുമായി മുകേഷ് അംബാനി ഇന്ത്യയിലെ ഏറ്റവും ധനികനായ വ്യവസായിയായി തുടരുന്നു. ആഗോളതലത്തിൽ അദ്ദേഹം 17-ാം സ്ഥാനത്താണ്. സിദ്ധാർഥ് ആനന്ദ് ഒരുക്കുന്ന കിംഗ് ആണ് ഇനി പുറത്തുവരാനുള്ള ഷാരൂഖ് ചിത്രം. പത്താൻ സിനിമയ്ക്ക് ശേഷം സിദ്ധാർഥ് ആനന്ദ് ഒരുക്കുന്ന മാസ്സ് ആക്ഷൻ ചിത്രമാണ് കിംഗ്. ചിത്രം ക്രിസ്മസ് റിലീസായി ഡിസംബർ 25 പുറത്തിറക്കാനാണ് അണിയറപ്രവർത്തകരുടെ പദ്ധതി.
ആദ്യം ഡിസംബർ 4 ന് ആയിരുന്നു റിലീസ് പദ്ധതിയിട്ടിരുന്നത്. എന്നാൽ നവംബർ അവസാന വാരം ബിഗ് ബജറ്റ് ചിത്രം രാമായണ പുറത്തിറങ്ങുന്നതിനാൽ ക്രിസ്മസിലേക്ക് റിലീസ് മാറ്റിവെക്കാൻ കിംഗ് ടീം തീരുമാനിക്കുകയായിരുന്നു എന്ന് ബോളിവുഡ് ഹങ്കാമ റിപ്പോർട്ട് ചെയ്യുന്നു. ഷാരൂഖ് ഖാന്റെ മകള് സുഹാനാ ഖാന് ആദ്യമായി ബിഗ് സ്ക്രീനിലെത്തുന്ന ചിത്രമെന്ന പ്രത്യേകതയും കിംഗിനുണ്ട്. ദീപിക പദുക്കോണ്, അഭിഷേക് ബച്ചന്, അനില് കപൂര് എന്നിവരും ചിത്രത്തില് പ്രധാനവേഷത്തില് എത്തുന്നുണ്ട്. വലിയ ബഡ്ജറ്റിൽ ഒരു ആക്ഷൻ ത്രില്ലറായി ഒരുങ്ങുന്ന സിനിമയ്ക്ക് മേൽ വലിയ പ്രതീക്ഷകളാണുള്ളത്. കിംഗിൻ്റെ സംഗീതം ഒരുക്കുന്നത് സച്ചിൻ ജിഗറും പശ്ചാത്തലസംഗീതം ചെയ്യുന്നത് അനിരുദ്ധ് ആണ്. സുജോയ് ഘോഷ് ആയിരുന്നു ചിത്രം ആദ്യം സംവിധാനം ചെയ്യാനിരുന്നത്. പിന്നീടത് സിദ്ധാർഥ് ആനന്ദ് ഏറ്റെടുക്കുകയായിരുന്നു.
