അർജുൻ അശോകൻ, ബാലു വർഗീസ്, അൽത്താഫ് സലിം, ശരത് സഭ, തമിഴ് നടൻ മൊട്ട രാജേന്ദ്രൻ എന്നിവർ പ്രധാന വേഷങ്ങളിൽ ഒന്നിക്കുന്ന പുതിയ ചിത്രം ‘മെൽകൗ പോണ്ടിച്ചേരി’യുടെ ടിക്കറ്റ് ബുക്കിംഗ് ആരംഭിച്ചു. പ്രമുഖ ബുക്കിംഗ് ആപ്പുകൾ വഴി പ്രേക്ഷകർക്ക് ടിക്കറ്റ് മുൻകൂട്ടി ബുക്ക് ചെയ്യാവുന്നതാണ്. നിഖിൽ മോഹൻ കഥയെഴുതി സംവിധാനം ചെയ്യുന്ന ചിത്രം നവംബർ 13-ന് തിയേറ്ററുകളിൽ ആഗോള റിലീസായി എത്തും. കേരളത്തിൽ നിന്നുള്ള ഒരു കൂട്ടം സുഹൃത്തുക്കൾ പോണ്ടിച്ചേരിയിലേക്ക് നടത്തുന്ന യാത്രയും തുടർന്നുണ്ടാകുന്ന രസകരവും അപ്രതീക്ഷിതവുമായ സംഭവങ്ങളുമാണ് കോമഡി-ഫൺ റൈഡറായി ഒരുക്കിയിരിക്കുന്ന ഈ ചിത്രത്തിന്റെ ഇതിവൃത്തം.
പുതുമുഖം ശ്രീലക്ഷ്മി വിജയനാണ് നായികയായി എത്തുന്നത്. സോഷ്യൽ മീഡിയ താരം അന്നാമ്മ, ചിത്രത്തിന്റെ തിരക്കഥാകൃത്ത് സനൂപ് തൈക്കുടം എന്നിവരും നിർണായക കഥാപാത്രങ്ങളെ അവതരിപ്പിക്കുന്നുണ്ട്. അരുൺ ഗോപി എക്സൈറ്റ്മെന്റ്സ്, ജസ്റ്റിൻ ആൻഡ് മാത്യു എന്റർടെയ്ൻമെന്റ്സ് എന്നിവയുടെ ബാനറിൽ അരുൺ ഗോപിയും ജസ്റ്റിൻ മാത്യുവും ചേർന്നാണ് ചിത്രം നിർമ്മിച്ചിരിക്കുന്നത്. ഗുഡ് വിൽ എന്റർടെയ്ൻമെന്റ്സ് ചിത്രം കേരളത്തിൽ പ്രദർശനത്തിനെത്തിക്കുമ്പോൾ ദി പ്ലോട്ട് പിക്ചേഴ്സ് ഓവർസീസ് വിതരണം നിർവ്വഹിക്കുന്നു. ചിത്രത്തിലെ ‘മല്ലിക മേനക’ എന്ന ഗാനം ഇതിനോടകം ശ്രദ്ധ നേടിയിട്ടുണ്ട്.
