അജയ് ദേവ്ഗൺ നായകനായ ദൃശ്യം 3 തിയേറ്ററുകളിൽ വിജയക്കുതിപ്പ് തുടരുമ്പോൾ, സസ്പെൻസും ഞെട്ടിക്കുന്ന ട്വിസ്റ്റുകളും നിറഞ്ഞ മികച്ച ഒടിടി ചിത്രങ്ങൾക്കായി തിരച്ചിലിലാണ് സിനിമാപ്രേമികൾ. മോഹൻലാലിന്റെ മലയാളം പതിപ്പിൽ നിന്ന് വ്യത്യസ്തമായ കഥാഗതിയുമായാണ് ഹിന്ദിയിൽ ദൃശ്യം മൂന്നാം ഭാഗം എത്തിയിരിക്കുന്നത്. മലയാളം, തമിഴ്, ഹിന്ദി ഭാഷകളിൽ നിന്നുള്ള ഏറ്റവും മികച്ച അഞ്ച് ക്രൈം ഇൻവെസ്റ്റിഗേഷൻ ത്രില്ലർ ചിത്രങ്ങൾ പരിചയപ്പെടുത്തുകയാണ് ഇവിടെ.
മലയാളത്തിന്റെ കുറ്റാന്വേഷണ ചരിത്രത്തിൽ നാഴികക്കല്ലായ എസ്.എൻ. സ്വാമി-കെ. മധു കൂട്ടുകെട്ടിൽ 1988-ൽ പുറത്തിറങ്ങിയ ‘ഒരു സിബിഐ ഡയറിക്കുറിപ്പ്’ ഈ പട്ടികയിൽ മുൻനിരയിലുണ്ട്. മമ്മൂട്ടിയുടെ സേതുരാമയ്യർ എന്ന ഐതിഹാസിക കഥാപാത്രം സ്ക്രീനിലെത്തിയ ഈ ചിത്രം മലയാള സിനിമയിലെ എക്കാലത്തെയും മികച്ച ക്ലാസിക്കുകളിൽ ഒന്നാണ്. സിനിമ ഇപ്പോൾ യൂട്യൂബിൽ ലഭ്യമാണ്. തമിഴിൽ നിന്ന് വിജയ് സേതുപതി നായകനായെത്തിയ ‘മഹാരാജ’ (2024) പ്രേക്ഷകരെ ഞെട്ടിച്ച മറ്റൊരു മാസ്റ്റർപീസ് ചിത്രമാണ്. ഒരു ബാർബറുടെ ഡസ്റ്റ്ബിൻ മോഷണം പോയതുമായി ബന്ധപ്പെട്ട് ആരംഭിക്കുന്ന കഥ പിന്നീട് തികച്ചും അപ്രതീക്ഷിതമായ ഗൗരവകരമായ വഴിയിലേക്ക് തിരിയുന്നതാണ് സിനിമയുടെ പ്ലോട്ട്. നെറ്റ്ഫ്ലിക്സിലാണ് ചിത്രം സ്ട്രീമിംഗ് ചെയ്യുന്നത്.
സുജോയ് ഘോഷ് സംവിധാനം ചെയ്ത് കരീന കപൂർ, ജയ്ദീപ് അഹ്ലാവത്, വിജയ് വർമ്മ എന്നിവർ പ്രധാന വേഷങ്ങളിൽ എത്തിയ ഹിന്ദി ചിത്രമാണ് ‘ജാനേ ജാൻ’ (2023). കെയ്ഗോ ഹിഗാഷിനോയുടെ പ്രശസ്ത നോവലിനെ അടിസ്ഥാനമാക്കി ഒരുക്കിയ ഈ ചിത്രം ഒറിജിനൽ ദൃശ്യത്തിന് പ്രചോദനമായ ഒന്നാണ്. നെറ്റ്ഫ്ലിക്സിൽ ചിത്രം കാണാം. ശ്രീരാം രാഘവൻ സംവിധാനത്തിൽ ആയുഷ്മാൻ ഖുറാന, തബു എന്നിവർ അഭിനയിച്ച ‘അന്ധാധുൻ’ (2018) ഡാർക്ക് ഹ്യൂമറും സസ്പെൻസും ഒരേപോലെ കോർത്തിണക്കിയ മികച്ചൊരു ത്രില്ലറാണ്. സംഗീതത്തിൽ ശ്രദ്ധ കേന്ദ്രീകരിക്കാൻ അന്ധനായി നടിക്കുന്ന പിയാനിസ്റ്റിന്റെ ജീവിതത്തിലുണ്ടാകുന്ന അപ്രതീക്ഷിത സംഭവങ്ങളാണ് ചിത്രം പറയുന്നത്. ഡിസ്നി പ്ലസ് ഹോട്ട്സ്റ്റാറിലാണ് ഈ സിനിമ കാണാൻ കഴിയുന്നത്.
വിഘ്നേഷ് രാജയുടെ സംവിധാനത്തിൽ അശോക് സെൽവനും ആർ. ശരത്കുമാറും ഒന്നിച്ച തമിഴ് ചിത്രം ‘പോർ തൊഴിൽ’ (2023) മറ്റൊരു മികച്ച അനുഭവമാണ്. യുവതികളെ ലക്ഷ്യമിട്ടുള്ള കൊലപാതക പരമ്പര അന്വേഷിക്കുന്ന ഒരു യുവ പോലീസ് ഉദ്യോഗസ്ഥന്റെയും പരിചയസമ്പന്നനായ ഉദ്യോഗസ്ഥന്റെയും കഥ പറയുന്ന ഈ ചിത്രം സോണി ലിവിലാണ് സ്ട്രീം ചെയ്യുന്നത്.
