മലയാള സിനിമയിൽ ആരാധകർ ഏറെയുള്ള താരങ്ങളാണ് ടൊവിനോ തോമസും നിവിൻ പോളിയും. ചെറുപ്പം മുതലേ ഫാമിലി ഫങ്ഷനുകളിൽ വെച്ച് ടൊവിനോയെ കാണാറുണ്ടെന്നും തങ്ങൾ കസിൻസാണെന്നും നിവിൻ തുറന്നുപറഞ്ഞു. ഇതുവരെ ഒന്നിച്ചു ക്യാമറയ്ക്ക് മുന്നിലെത്തിയിട്ടില്ലെങ്കിലും ടൊവിനോയുടെ കരിയറിലെ വമ്പൻ വളർച്ചയിൽ അഭിമാനമുണ്ടെന്നും, അദ്ദേഹത്തിന്റെ പുതിയ പ്രൊജക്ടുകൾക്കെല്ലാം എല്ലാവിധ വിജയങ്ങളും ആശംസിക്കുന്നുവെന്നും നിവിൻ വ്യക്തമാക്കി. ‘യേഴ് കടല്‍ യേഴ് മലൈ’ എന്ന സിനിമയുടെ പ്രമോഷനുമായി ബദ്ധപ്പെട്ട് ബിഹൈൻഡ് വുഡ്സിന് നൽകിയ അഭിമുഖത്തിലാണ് പ്രതികരണം.
‘ടൊവിയും ഞാനും കസിൻസാണ്. ഫസ്റ്റ് കസിൻ അല്ലെങ്കിലും സെക്കൻഡ് കസിനാണ്. ചെറുപ്പത്തിൽ ഫാമിലി ഫങ്ഷനുകൾക്കൊക്കെ പോകുമ്പോൾ പരസ്പരം കാണാറുണ്ട്. എന്റെ അമ്മയും ടൊവിനോയുടെ അച്ഛനും ഒരുമിച്ച് പഠിച്ചതാണ്. സ്കൂളിലോ ചർച്ചിലോ എവിടെയോ വെച്ചാണ് അവർ ഒന്നിച്ച് പഠിച്ചത്. ഞങ്ങൾ രണ്ടുപേരും ഇതുവരെ ഒന്നിച്ചു ഒരു സിനിമ ചെയ്തിട്ടില്ല. പക്ഷേ സിനിമയെക്കുറിച്ച് എന്തെങ്കിലും സംശയങ്ങളോ കാര്യങ്ങളോ വരുമ്പോൾ ഞങ്ങൾ പരസ്പരം സംസാരിക്കാറുണ്ട്,’ നിവിൻ പറഞ്ഞു. ടൊവിനോ സിനിമാരംഗത്ത് സ്വന്തമാക്കിയ വലിയ വളർച്ചയെയും ആരാധക പിന്തുണയെയും നിവിൻ അഭിനന്ദിച്ചു. ‘ടൊവിയുടെ വളർച്ചയിലും വിജയത്തിലും എനിക്ക് വലിയ സന്തോഷമുണ്ട്. കേരളത്തിൽ വലിയൊരു ഫാൻബേസ് ഉള്ള നടനാണ് ടൊവിനോ. ‘ലോകഃ 2’ പോലെയുള്ള വലിയ സിനിമകളാണ് ഇനി ടൊവിയുടേതായി പുറത്തുവരാനിരിക്കുന്നത്. ആ സിനിമകളെല്ലാം വലിയ വിജയമായി തീരട്ടെ എന്ന് മനസ്സാ ആശംസിക്കുന്നു,’നിവിൻ കൂട്ടിച്ചേർത്തു.
നീണ്ട ഇടവേളയ്ക്കു ശേഷം മികച്ച ബോക്സ് ഓഫീസ് വിജയങ്ങളിലൂടെ തിരിച്ചുവരവ് നടത്തിയിരിക്കുകയാണ് നിവിൻ പോളി. 2025 അവസാനത്തോടെ പുറത്തിറങ്ങിയ അഖിൽ സത്യൻ ചിത്രം ‘സർവ്വം മായ’ തിയറ്ററുകളിൽ നിന്ന് 150 കോടിയോളമാണ് വാരിയത്. തൊട്ടുപിന്നാലെ, കഴിഞ്ഞ മാസം തീയറ്ററുകളിലെത്തിയ ഗിരീഷ് എ.ഡി ചിത്രം ‘ബെത്‌ലഹേം കുടുംബ യൂണിറ്റ്’ ബോക്സ് ഓഫീസിൽ വൻ തരംഗമായി മാറി. കേരളത്തിൽ നിന്നു മാത്രം 150 കോടിയും ആഗോളതലത്തിൽ 320 കോടിയിലധികവും നേട്ടമുണ്ടാക്കിയാണ് ചിത്രം നിവിൻ പോളിയുടെ തിരിച്ചുവരവ് ഗംഭീരമാക്കിയത്. ചിത്രം ഒടിടി യിൽ എത്തിയതിന് പിന്നാലെയും മികച്ച അഭിപ്രായമാണ് നേടുന്നത്.
