കുഞ്ചാക്കോ ബോബനും ലിജോമോൾ ജോസും ആദ്യമായി ഒന്നിക്കുന്ന ‘ഉന്മാദം’ സിനിമയിലെ ആദ്യ ഗാനം പുറത്തിറങ്ങി. ബിജിബാൽ ആലപിച്ച ‘അകലെ ഒരു സ്വർണ്ണ കലമാനോ…’ എന്ന് തുടങ്ങുന്ന ഗാനത്തിന് സംഗീതമൊരുക്കിയിരിക്കുന്നത് മുജീബ് മജീദും വരികളെഴുതിയിരിക്കുന്നത് വിനായക് ശശികുമാറുമാണ്.
ശ്രദ്ധേയനായ എഡിറ്റർ കിരൺ ദാസ് ആദ്യമായി സംവിധാനം ചെയ്യുന്ന ഈ ചിത്രത്തിന് തിരക്കഥയൊരുക്കിയിരിക്കുന്നത് ഷാഹി കബീറാണ്. കുഞ്ചാക്കോ ബോബൻ അവതരിപ്പിക്കുന്ന ‘ഷെല്ലി’ എന്ന കഥാപാത്രത്തിന്റെ അച്ഛന്റെ മരണശേഷമുള്ള വീട്ടിലെ കാഴ്ചകളും കഥയിലെ ദുരൂഹതകളും സൂചിപ്പിക്കുന്നതാണ് പുതിയ ഗാനരംഗങ്ങൾ.
അന്ധവിശ്വാസവുമായി ബന്ധപ്പെട്ട ഒരു പോലീസ് സ്റ്റേഷൻ ഫയലിന് പിന്നാലെ പോകുന്ന വേറിട്ടൊരു പോലീസ് കഥാപാത്രത്തെയാണ് ചിത്രത്തിൽ കുഞ്ചാക്കോ ബോബൻ അവതരിപ്പിക്കുന്നത്. ടി-സീരീസും പനോരമ സ്റ്റുഡിയോസും ചേർന്ന് അവതരിപ്പിക്കുന്ന വൻ താരനിര അണിനിരക്കുന്ന ‘ഉന്മാദം’ ജൂലൈ 31-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.
