ആസിഫ് അലിയെ നായകനാക്കി രോഹിത് വി. എസ്. സംവിധാനം ചെയ്യുന്ന ഏറ്റവും പുതിയ മാസ്സ് ആക്ഷൻ ചിത്രം ‘ടിക്കി ടാക്ക’യുടെ റിലീസ് സംബന്ധിച്ച വിവരങ്ങൾ പുറത്ത്. മുൻകൂട്ടി തീരുമാനിച്ച ഒരു റിലീസ് തീയതിക്ക് വേണ്ടി ചിത്രത്തിന്റെ പോസ്റ്റ് പ്രൊഡക്ഷൻ ജോലികളോ സിജിഐ വർക്കുകളോ തിരക്കിട്ട് തീർക്കാൻ അണിയറപ്രവർത്തകർ ഉദ്ദേശിക്കുന്നില്ലെന്ന് സിനിമയുടെ തിരക്കഥാകൃത്ത് നിയോഗ് കൃഷ്ണ വ്യക്തമാക്കി. സാങ്കേതിക ജോലികളെല്ലാം പൂർണ്ണമായ തൃപ്തിയോടെ പൂർത്തിയാക്കിയ ശേഷം വരാനിരിക്കുന്ന സെപ്റ്റംബർ-ഒക്ടോബർ മാസങ്ങളിൽ സിനിമയുടെ റിലീസ് പ്രഖ്യാപിക്കുമെന്ന് പ്രതീക്ഷിക്കുന്നു എന്നും നിയോഗ് കൂട്ടിച്ചേർത്തു.
മലയാള സിനിമയിൽ ഇതുവരെ കണ്ടിട്ടില്ലാത്ത തരത്തിൽ ആക്ഷനിലൂടെ കഥ പറയുന്ന ചിത്രമായിരിക്കും ‘ടിക്കി ടാക്ക’യെന്ന് സംവിധായകൻ രോഹിത് വി. എസ്. നേരത്തെ വ്യക്തമാക്കിയിരുന്നു. നമ്മൾ സാധാരണ കണ്ടുവരുന്ന സിനിമകളിൽ കഥാ സന്ദർഭങ്ങൾക്ക് ഇടയിലാണ് ആക്ഷൻ രംഗങ്ങൾ വരുന്നതെങ്കിൽ, ഇവിടെ ആക്ഷൻ രംഗങ്ങളിലൂടെയാണ് സിനിമയുടെ കഥ സഞ്ചരിക്കുന്നത്. ചിത്രത്തിൽ ചെറുതും വലുതുമായ 22 അതിശക്തമായ ആക്ഷൻ രംഗങ്ങളാണ് ഉൾപ്പെടുത്തിയിരിക്കുന്നത്. ഈ ചിത്രത്തിലെ മാസ്സ് പ്രകടനത്തിനായി നടൻ ആസിഫ് അലി വലിയ രീതിയിലുള്ള ശരീര മാറ്റവും നടത്തിയിട്ടുണ്ട്.
വാമിഖ ഗബ്ബി, സഞ്ജന നടരാജൻ, ലുക്മാൻ അവറാൻ, നസ്ലെൻ എന്നിവർ പ്രധാന വേഷങ്ങളിലെത്തുന്ന ഈ ചിത്രം ബോളിവുഡിലെ വമ്പൻ നിർമ്മാണ കമ്പനികളായ ടി-സീരീസ്, പനോരമ സ്റ്റുഡിയോസ് എന്നിവരുടെ സഹകരണത്തോടെയാണ് ഒരുങ്ങുന്നത്. ബോളിവുഡ് ചിത്രം ‘ദൃശ്യം’ സംവിധാനം ചെയ്ത അഭിഷേക് പഥക്കും ചിത്രത്തിന്റെ നിർമ്മാണ പങ്കാളിയാണ്. അഡ്വഞ്ചേഴ്സ് കമ്പനിയുടെ ബാനറിൽ ജൂവിസ് പ്രൊഡക്ഷൻസ് ഒരുക്കുന്ന ഈ ചിത്രത്തിന് നിയോഗ് കൃഷ്ണ, ഫിറോസ് നജീബ്, യദു പുഷ്പാകരൻ എന്നിവർ ചേർന്നാണ് തിരക്കഥയൊരുക്കുന്നത്.
