തെലുങ്ക് സൂപ്പർതാരം രാം ചരൺ നായകനായ പാൻ ഇന്ത്യൻ ചിത്രം ‘പെഡി’ ബോക്സ് ഓഫീസിൽ പുത്തൻ റെക്കോർഡുകൾ സൃഷ്ടിച്ച് മുന്നേറുന്നു. റിലീസ് ചെയ്ത് ചുരുങ്ങിയ ദിവസങ്ങൾക്കുള്ളിൽ ചിത്രം ആഗോളതലത്തിൽ 279.35 കോടി രൂപ വാരിക്കൂട്ടിയതായി സാക്നിൽക് റിപ്പോർട്ട് ചെയ്യുന്നു. ഇതിൽ ഇന്ത്യയിൽ നിന്ന് മാത്രം 229.95 കോടി രൂപയാണ് ഗ്രോസ് കളക്ഷനായി നേടിയത്. ആദ്യ രണ്ട് ദിനം കൊണ്ട് 181 കോടിയോളം നേടിയ ചിത്രം മൂന്നാം ദിനത്തിൽ 55 കോടിയോളം രൂപയാണ് ആഗോള മാർക്കറ്റിൽ നിന്ന് സ്വന്തമാക്കിയത്. രാം ചരണിന്റെ കരിയറിലെ തന്നെ ഏറ്റവും വലിയ സോളോ ഹിറ്റിലേക്കാണ് ചിത്രം കുതിക്കുന്നത്.
അതേസമയം, ചിത്രത്തിലെ നായികയെ ഉപഭോഗവസ്തുവായി ചിത്രീകരിച്ചു എന്ന പേരിൽ സംവിധായകനെതിരെ കടുത്ത വിമർശനങ്ങളും ഉയരുന്നുണ്ട്. സിനിമാ രംഗത്തെ പ്രമുഖരായ നിരവധി നടിമാർ ഇതിനെതിരെ പരസ്യമായി രംഗത്തെത്തിയിട്ടുണ്ട്. ഈ വിവാദങ്ങൾക്കിടയിലും വിദേശ വിപണിയിലും ചിത്രത്തിന് ഗംഭീര പ്രതികരണമാണ് ലഭിക്കുന്നത്. ദേശീയ അവാർഡ് ജേതാവ് ബുചി ബാബു സന സംവിധാനം ചെയ്ത ഈ ബിഗ് ബജറ്റ് ചിത്രം വൃദ്ധി സിനിമാസ്, മൈത്രി മൂവി മേക്കർസ്, സുകുമാർ റൈറ്റിങ്സ് എന്നിവർ ചേർന്നാണ് നിർമ്മിച്ചത്. ചിത്രത്തിന്റെ മലയാളം, തമിഴ് പതിപ്പുകൾ തിങ്ക് സ്റ്റുഡിയോസ് ആണ് കേരളത്തിലും തമിഴ്നാട്ടിലും തിയേറ്ററുകളിൽ എത്തിച്ചത്.
ടൈറ്റിൽ കഥാപാത്രമായ ‘പെഡി’യായി എത്തിയ രാം ചരണിന്റെ ഗംഭീര ശാരീരിക മാറ്റവും പ്രകടനവുമാണ് ചിത്രത്തിന്റെ പ്രധാന ആകർഷണം. ജാൻവി കപൂർ നായികയായ ചിത്രത്തിൽ കന്നഡ സൂപ്പർതാരം ശിവരാജ് കുമാറും ഒരു പ്രധാന വേഷത്തിൽ എത്തുന്നുണ്ട്. രാം ചരൺ- ശിവരാജ് കുമാർ കോമ്പോ ആദ്യമായി ഒന്നിച്ച ചിത്രം കൂടിയാണിത്. എ ആർ റഹ്മാൻ ഒരുക്കിയ സംഗീതവും ചിത്രത്തിലെ ആക്ഷൻ, ഡ്രാമ, വൈകാരിക നിമിഷങ്ങൾ എന്നിവയ്ക്കൊപ്പം സ്പോർട്സ് ഘടകങ്ങളും വലിയ രീതിയിൽ പ്രേക്ഷക പ്രശംസ പിടിച്ചുപറ്റുന്നു.
