സോഷ്യൽ മീഡിയ സെൻസേഷനായ ഹാഷിറും സംഘവും തകർത്താടിയ ‘വാഴ’യുടെ രണ്ടാം ഭാഗം ബോക്സ് ഓഫീസിൽ റെക്കോർഡുകൾ തകർത്ത് മുന്നേറുന്നു. റിലീസ് ചെയ്ത ആദ്യ ദിനം തന്നെ ആഗോളതലത്തിൽ 10.5 കോടി രൂപയുടെ റെക്കോർഡ് കളക്ഷൻ സ്വന്തമാക്കിയ ചിത്രം സിനിമാ ലോകത്തെ അമ്പരപ്പിച്ചിരിക്കുകയാണ്. കേരളത്തിൽ നിന്ന് മാത്രം 5.13 കോടി രൂപ നേടിയ സിനിമയ്ക്ക് മിഡിൽ ഈസ്റ്റ് മാർക്കറ്റിൽ നിന്നും മികച്ച പ്രതികരണമാണ് ലഭിക്കുന്നത്. അഡ്വാൻസ് ബുക്കിങ്ങിലും വിസ്മയിപ്പിക്കുന്ന കുതിപ്പാണ് വാഴ 2 കാഴ്ചവെക്കുന്നത്.
കേരള ബോക്സ് ഓഫീസിൽ ആദ്യ ഞായറാഴ്ചയിലെ ഉയർന്ന അഡ്വാൻസ് സെയിലിൽ ദളപതി വിജയ്യുടെ ലിയോയെ മറികടന്ന് ചിത്രം മൂന്നാം സ്ഥാനത്തെത്തി. 5.04 കോടി രൂപയാണ് ഞായറാഴ്ചത്തെ അഡ്വാൻസ് ബുക്കിങ്ങിലൂടെ മാത്രം സിനിമ നേടിയത്. എമ്പുരാൻ, തുടരും എന്നീ ചിത്രങ്ങൾക്ക് പിന്നാലെയാണ് ഇപ്പോൾ വാഴ 2 ഇടംപിടിച്ചിരിക്കുന്നത്. ആദ്യ ഭാഗത്തേക്കാൾ മികച്ചതാണ് രണ്ടാം ഭാഗമെന്നും കോമഡിക്കൊപ്പം തന്നെ വൈകാരികമായ രംഗങ്ങളും മികച്ച രീതിയിൽ അവതരിപ്പിച്ചിട്ടുണ്ടെന്നുമാണ് പ്രേക്ഷകരുടെ വിലയിരുത്തൽ.
സവിൻ എസ്.എ സംവിധാനം ചെയ്ത ചിത്രത്തിന് തിരക്കഥ ഒരുക്കിയത് വിപിൻ ദാസാണ്. ഹാഷിർ, അൽ അമീൻ തുടങ്ങിയ സോഷ്യൽ മീഡിയ താരങ്ങൾക്കൊപ്പം അൽഫോൻസ് പുത്രൻ, അജു വർഗീസ്, വിജയ് ബാബു എന്നിവരും പ്രധാന വേഷങ്ങളിലെത്തുന്നു. 2024 ഓഗസ്റ്റിൽ റിലീസ് ചെയ്ത ആദ്യ ഭാഗം 40 കോടിയോളം രൂപ നേടിയിരുന്നു. ആ വിജയത്തെ കടത്തിവെട്ടുന്ന രീതിയിലുള്ള കുതിപ്പാണ് രണ്ടാം ഭാഗം ഇപ്പോൾ നടത്തിക്കൊണ്ടിരിക്കുന്നത്. ഹാഷിർ ആൻഡ് ഗ്യാങ്ങിന്റെ പ്രകടനം തന്നെയാണ് സിനിമയുടെ പ്രധാന ആകർഷണമായി സിനിമാ പ്രേമികൾ ചൂണ്ടിക്കാണിക്കുന്നത്.
