മലയാളികളുടെ പ്രിയപ്പെട്ട നടനാണ് അല്ലു അർജുൻ. മല്ലു അർജുൻ എന്നാണ് സ്നേഹത്തോടെ നടനെ മലയാളി പ്രേക്ഷകർ വിളിക്കുന്നത്. അല്ലുവിൻ്റെ ആദ്യകാല സിനിമകൾ എല്ലാം കേരളത്തിൽ വലിയ വിജയങ്ങൾ ആയിരുന്നു. ഇപ്പോഴിതാ അല്ലു അർജുന്റെ പിറന്നാൾ പ്രമാണിച്ചു രണ്ട് ഹിറ്റ് സിനിമകൾ ആണ് റീ റിലീസിന് ഒരുങ്ങുന്നത്. ‘റേസ് ഗുരം’ എന്ന പേരിൽ സുരേന്ദർ റെഡ്ഡി ഒരുക്കി തെലുങ്കിൽ പുറത്തിറങ്ങിയ സിനിമ മലയാളത്തിലും വമ്പൻ വിജയമായിരുന്നു. ‘ലക്കി ദി റേസർ’ എന്നായിരുന്നു സിനിമയുടെ മലയാളം പതിപ്പിന്റെ പേര്. അല്ലുവിൻ്റെ പിറന്നാൾ ദിനമായ ഏപ്രിൽ എട്ടിന് റേസ് ഗുരം റീ റിലീസ് ചെയ്യും. സിനിമയുടെ തെലുങ്ക് പതിപ്പാണ് ഇത്തവണ എത്തുന്നത്. അതേസമയം, സിനിമയുടെ മലയാളം പതിപ്പ് റീ റിലീസ് ചെയ്യുമോ എന്ന അപ്ഡേറ്റ് ഒന്നും പുറത്തുവന്നിട്ടില്ല. അടുത്തിടെ ചിത്രം വീണ്ടും കേരളത്തിൽ ട്രെൻഡായിരുന്നു. ഇതിനൊപ്പം അല്ലുവിന്റെ മറ്റൊരു ഹിറ്റ് ചിത്രമായ ഹാപ്പിയും റീ റിലീസ് ചെയ്യുന്നുണ്ട്.
ഹാപ്പിയുടെ മലയാളം പതിപ്പാണ് റീ റിലീസിന് ഒരുങ്ങുന്നത്. കരുണാകരൻ ഒരുക്കിയ സിനിമ കേരളത്തിൽ 150 ദിവസത്തിന് മേൽ പ്രദർശിപ്പിച്ചിരുന്നു. ഇപ്പോഴിതാ 20 വർഷത്തിന് ശേഷം ചിത്രം വീണ്ടും ബിഗ് സ്ക്രീനിലേക്ക് തിരിച്ചെത്തുകയാണ്. ഏപ്രിൽ എട്ടിനാണ് ഹാപ്പിയും ബിഗ് സ്ക്രീനിലേക്ക് തിരിച്ചെത്തുന്നത്. 4K ഡോൾബി അറ്റ്മോസിലാണ് ചിത്രം റീ റിലീസിന് ഒരുങ്ങുന്നത്. ഗീത ആർട്സിന്റെ ബാനറിൽ അല്ലു അരവിന്ദ് നിർമ്മിച്ച ചിത്രത്തിൽ അല്ലു അർജുനൊപ്പം ജെനീലിയ ഡിസൂസ, മനോജ് ബാജ്പേയി എന്നിവരും പ്രധാന വേഷത്തിലെത്തിയിരുന്നു. ചിത്രത്തിലെ പാട്ടുകളും സൂപ്പർ ഹിറ്റായിരുന്നു. മികച്ച നിരൂപക പ്രശംസയും ചിത്രം നേടിയിരുന്നു.
സിനിമ 20 വർഷം പൂർത്തിയായ വേളയിൽ എല്ലാവരോടും നന്ദി അറിയിച്ച് അല്ലു അർജുൻ എത്തിയിരുന്നു. ‘ഹാപ്പി എന്റെ യാത്രയിലെ ഏറ്റവും ആസ്വാദ്യകരമായ ചിത്രങ്ങളിൽ ഒന്നാണ്. ഈ യാത്ര മനോഹരമാക്കിയ എല്ലാ കലാകാരന്മാർക്കും സാങ്കേതിക പ്രവർത്തകർക്കും എന്റെ ഹൃദയം നിറഞ്ഞ നന്ദി,’ ഹാപ്പി ലൊക്കേഷൻ ചിത്രങ്ങൾ പങ്കുവെച്ച് അല്ലു അർജുൻ സോഷ്യൽ മീഡിയയിൽ കുറിച്ചു. ലോകേഷ് കനകരാജ് ഒരുക്കുന്ന AA 23 ആണ് ഇനി പുറത്തുവരാനുള്ള അല്ലു ചിത്രം. അനിരുദ്ധ് ആണ് സിനിമയ്ക്കായി സംഗീതം ഒരുക്കുന്നത്. ഒരു പക്കാ ആക്ഷൻ സിനിമയാകും ഇതെന്ന സൂചനയാണ് അനൗൺസ്മെന്റ് വീഡിയോ നൽകുന്നത്.
