വിനോദിന്റെ സംവിധാനത്തിൽ ദളപതി വിജയ് നായകനാകുന്ന ജനനായകന്റെ പുതിയ പോസ്റ്റർ റിലീസ് ചെയ്തു. കരൂരിലെ ദാരുണ സംഭവത്തിന് ശേഷം പുറത്തുവരുന്ന ആദ്യ ജനനായകൻ അപ്പ്ഡേറ്റ് ആണ് ഈ പോസ്റ്റർ. എന്നാൽ മുൻ പോസ്റ്ററുകൾ പോലെ ഇത്തവണ അത് വിജയ് തന്റെ ഒഫിഷ്യൽ പേജുകളിലൊന്നും പങ്കുവെച്ചില്ല എന്നതും ശ്രദ്ധേയമാണ്. പോസ്റ്ററിൽ ജനക്കൂട്ടത്തിനു നടുവിൽ കൂളിംഗ് ഗ്ലാസ് വെച്ച് നിൽക്കുന്ന വിജയ്‌യെയാണ് കാണിച്ചിരിക്കുന്നത്. ജനങ്ങൾ വിജയ്‌യുടെ ദേശത്തിൽ ഒരു രക്ഷകനെയെന്ന പോലെ തൊട്ടിരിക്കുന്നതും കാണാം. പോസ്റ്റർ കണ്ടപ്പോൾ ബാറ്റ്മാൻ vs സൂപ്പർമാൻ എന്ന ചിത്രത്തിലെ ഒരു രംഗത്തിലെ സൂപ്പർമാന്റെ നിൽപ്പാണ് ഓർമ്മ വന്നതെന്നാണ് ചില ആരാധകർ കമന്റ് ചെയ്യുന്നത്.
അനിരുദ്ധ് രവിചന്ദർ സംഗീത സംവിധാനം നിർവഹിക്കുന്ന ചിത്രത്തിലെ ആദ്യ ഗാനം നവംബർ എട്ടിന് തിയറ്ററുകളിലെത്തും എന്നാണ് അണിയറപ്രവർത്തകർ അറിയിച്ചിരിക്കുന്നത്. ചിത്രത്തിൽ വിജയ എത്ര ഗാനങ്ങൾ ആലപിച്ചിരിക്കുന്നുണ്ട് എന്ന വിവരം ഇതുവരെ പുറത്തുവിട്ടിട്ടില്ല. തന്റെ കരിയറിലെ അവസാന ചിത്രമാകും ജനനായകൻ എന്നാണു വിജയ് പല തവണ പറഞ്ഞിരുന്നത്, അതിനാൽ ജനനായകൻ ഈ വര്ഷം രാജ്യത്തെ തന്നെ ഏറ്റവും പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നായിട്ടാണ് വിലയിരുത്തപ്പെടുന്നത്. ചിത്രം ജനുവരി ഒൻപതിന് തിയറ്ററുകളിലെത്തും.
