ആഗോള സീരീസ് പ്രേക്ഷകർ ഏറെ ആകാംഷയോടെ കാത്തിരിക്കുന്ന നെറ്ഫ്ലിക്സിന്റെ ഏറ്റവും വമ്പൻ ഷോയായ സ്ട്രേഞ്ചർ തിങ്സിന്റെ ട്രെയ്ലർ സോഷ്യൽ മീഡിയയിൽ ലീക്കായി. 2016ൽ സ്ട്രീമിങ് ആരംഭിച്ച സീരിസിന്റെ അഞ്ചാമത്തേയും അവസാനത്തെയും സീസന്റെ ട്രെയ്ലർ ആണിത് എന്നത് ശ്രദ്ധേയമാണ്. സീരീസിന്റെ ചില ദൃശ്യങ്ങളുടെ ചിത്രങ്ങൾ ടീസർ റിലീസാകുന്നതിന് മുന്നേ തന്നെ ഇതേ രീതിയിൽ ലീക്കായിരുന്നു. എന്നാൽ ട്രെയ്ലർ തന്നെ ലീക്കായത് നെറ്റ്ഫ്ലിക്സിന്റെ പ്രമോഷൻ പരിപാടികളെ സാരമായി ബാധിക്കുമെന്നാണ് ആരാധകരുടെ വിലയിരുത്തൽ. നെറ്ഫ്ലിക്സിറ്റിന്റെ ചരിത്രത്തിലെ തന്നെ ഏറ്റവും മുതൽ മുടക്കിലാണ് സീരിസിന്റെ അവസാന സീസൺ ഒരുക്കിയിരിക്കുന്നതെന്തന്നാണ് റിപ്പോർട്ടുകൾ.
ഇന്ത്യാനയിലെ ഹോക്കിൻസ് എന്ന ചെറുപട്ടണത്തിൽ 1980കളിൽ നടക്കുന്ന ദുരൂഹവും അവിശ്വസനീയവുമായ സംഭവങ്ങളാണ് സീരീസ് പറയുന്നത്. വസ്തുക്കളെ സ്പർശിക്കാതെ ചലിപ്പിക്കാൻ സാധിക്കുന്ന ശക്തിയുള്ള ഇലവൻ എന്ന പെൺകുട്ടിയും കൂട്ടുകാരും ചേർന്ന് ഭീകര ജീവികളുമായി പോരാടുന്നതായിരുന്നു 4 സീസണിലും പ്രധാനമായുമുള്ള സംഭവങ്ങൾ. മൂന്ന് വോളിയമായാണ് സീരീസ് സ്ട്രീം ചെയ്യുക, ആദ്യ വോളിയം നവംബർ 26 നും രണ്ടാം വോളിയം ഡിസംബർ 25 നും, മൂന്നാം വോളിയം ഡിസംബർ 31 നാണു ആരാധകരിലേക്കെത്തുക. സീരീസിന്റെ സൃഷ്ട്ടാക്കളായ ഡഫർ സഹോദരന്മാർക്കൊപ്പം ഡെഡ്പൂൾ vs വൂൾവെറിൻ എന്ന ചിത്രത്തിന്റെ സംവിധായകൻ ഷോൺ ലെവിയും സീരീസിന്റെ ചില എപ്പിസോഡുകൾ സംവിധാനം ചെയ്യുന്നുണ്ട്.
