നവാഗതനായ വീര സംവിധാനം ചെയ്യുന്ന, ഷെയിന് നിഗം നായകനാകുന്ന സിനിമയാണ് ഹാല്. ചിത്രത്തില് നിന്ന് ചില രംഗങ്ങള് നീക്കം ചെയ്യാന് ആവശ്യപ്പെട്ടിരിക്കുകയാണ് സെന്സര് ബോര്ഡ്. ഇപ്പോഴിതാ സെന്സര് ബോര്ഡിന്റെ ഈ നടപടിക്കെതിരെ സോഷ്യല് മീഡിയയില് കാമ്പെയ്ന് ആരംഭിച്ചിരിക്കുകയാണ്. ‘ വെട്ടി മുറിക്കാത്ത ഹാല് മൂവി ഞങ്ങള്ക്ക് കാണണം #wesupporthaalmovie #nilapadu’ എന്ന പോസ്റ്റോടു കൂടിയാണ് സോഷ്യല് മീഡിയയില് കാമ്പെയ്ന് ആരംഭിച്ചിരിക്കുന്നത്. കെ മധുപാല് അടക്കമുള്ള പ്രമുഖര് പോസ്റ്റര് പങ്കുവച്ചിട്ടുണ്ട്. സിനിമയിലെ ബീഫ് ബിരിയാണി രംഗം ഒഴിവാക്കണം എന്നാണ് സിബിഎഫ്സി ആവശ്യപ്പെട്ടിരിക്കുന്നത്. ധ്വജ പ്രണാമം, സംഘം കാവലുണ്ട്, രാഖി പരാമര്ശങ്ങള് എന്നിവ നീക്കം ചെയ്യാമെന്നാണ് സെന്സര് ബോര്ഡിന്റെ നിര്ദേശം. ഇവയെല്ലാം അടക്കം 15 സീനുകളില് മാറ്റങ്ങള് വേണമെന്ന് സിബിഎഫ്സി അറിയിച്ചു.
ഈ മാറ്റങ്ങള് വരുത്തിയാല് സിനിമയ്ക്ക് എ സര്ട്ടിഫിക്കറ്റെങ്കിലും നല്കാമെന്നാണ് സിബിഎഫ്സിയുടെ നിലപാട്. സിബിഎഫ്സി നടപടിക്കെതിരെ ഹൈക്കോടതിയെ സമീപിച്ചിരിക്കുകയാണ് നിര്മ്മാതാക്കള്. ജെ വി ജെ പ്രൊഡക്ഷന്സാണ് ചിത്രം നിര്മിച്ചിരിക്കുന്നത്. സിനിമയില് ന്യൂഡിറ്റിയോ വയലന്സോ ഇല്ലാത്ത സിനിമയ്ക്ക് എന്തിനാണ് എ സര്ട്ടിഫിക്കറ്റ് നല്കുന്നതെന്ന് അണിയറപ്രവര്ത്തകര് ചോദിക്കുന്നു. സമൂഹത്തിലെ ചില പ്രശ്നങ്ങളെ കുറിച്ച് സംസാരിക്കാന് ശ്രമിക്കുക മാത്രമാണ് ചെയ്തിട്ടുള്ളതെന്നും ഇവര് പറയുന്നു. ‘സിനിമ നല്കുന്ന മെസേജിനെ സെന്സര് ബോര്ഡ് ഭയപ്പെടുന്നു..പുതിയ തലമുറ സിനിമ കാണാതിരിക്കാനുള്ള നീക്കം. ഹൈക്കോടതി ഈ സിനിമ കണ്ടു നല്ലതാണെന്ന് തോന്നിയാല് മാത്രം പുറത്തിറക്കിയാല് മതി.
സിനിമയുമായി യാതൊരു ബന്ധവുമില്ലാത്തവര് വന്ന് അത് കട്ട് ചെയ്യൂ, ഇത് കട്ട് ചെയ്യൂ, എന്ന് പറഞ്ഞാല് അതില് എവിടെയാണ് ആവിഷ്ക്കാര സ്വാതന്ത്ര്യം,’ എന്ന് വീര ചോദിക്കുന്നു. റിപ്പോര്ട്ടര് ടി വിയോടായിരുന്നു സംവിധായകന്റെ പ്രതികരണം. ഈ വര്ഷം പുറത്തിറങ്ങിയ എമ്പുരാന്, ജെ എസ് കെ എന്നീ ചിത്രങ്ങളിലും ഏറ്റവും ഒടുവിലായി ഇന്ദ്രന്സ് നായകനാകുന്ന പ്രൈവറ്റ് എന്ന സിനിമയിലും സെന്സര് ബോര്ഡ് കത്രിക വെച്ചിരുന്നു. ഇതിനെതിരെ വ്യാപക പ്രതിഷേധമാണ് മലയാള സിനിമാ മേഖലയില് നിന്നും ഉണ്ടായിരുന്നത്. ഹാലില് ഷെയ്ന് നിഗത്തിനൊപ്പം സാക്ഷി വൈദ്യയാണ് നായികയായി എത്തുന്നത്. ജോണി ആന്റണി, നത്ത്, വിനീത് ബീപ്കുമാര്, കെ മധുപാല്, സംഗീത മാധവന് നായര്, ജോയ് മാത്യു, നിഷാന്ത് സാഗര്, നിയാസ് ബെക്കര്, റിയാസ് നര്മകാല, സുരേഷ് കൃഷ്ണ, രവീന്ദ്രന്, സോഹന് സീനുലാല്, മനോജ് കെ യു, ഉണ്ണിരാജ, ശ്രീധന്യ തുടങ്ങിയവരും ചിത്രത്തില് ശ്രദ്ധേയ വേഷങ്ങളില് എത്തുന്നുണ്ട്.
