സന്ദീപ് റെഡ്ഡി വാങ്കയുടെ സംവിധാനത്തിൽ പ്രഭാസ് നായകനാകുന്ന ‘സ്പിരിറ്റ്’ എന്ന ചിത്രത്തിന്റെ ടൈറ്റിൽ ടീസർ റിലീസായതിന് പിറകെ പ്രഭാസിന്റെയും സാക്ഷാൽ ഷാരൂഖ് ഖാന്റെയും ആരാധകർ തമ്മിൽ സോഷ്യൽ മീഡിയയിൽ തർക്കം. ടീസറിൽ പ്രഭാസിന്റെ പേര് എഴുതി കാണിക്കുന്നത് ‘ഇന്ത്യയിലെ ഏറ്റവും വലിയ സൂപ്പർതാരം’ എന്ന വിശേഷണത്തോടെയായിരുന്നു. എന്നാൽ ഇത് തെറ്റാണെന്നും ഷാരൂഖ് ഖാന് ശേഷമേ ഒരു സൂപ്പർതാരം രാജ്യത്തുള്ളൂ എന്ന രീതിയിൽ ഷാരൂഖ് ആരാധകർ തിരിച്ചടിച്ചു.
ഇന്ത്യയ്ക്ക് അകത്തും പുറത്തും ഇന്ത്യൻ സിനിമ വ്യവസായത്തിന്റെ മുഖമായി മാറിയ ഷാരൂഖ് ഖാന്റെ മുകളിൽ പ്രഭാസിന്റെ പ്രതിഷ്ഠിക്കുന്നതിലെ സാംഗത്യം എന്താണെന്നായിരുന്നു ഷാരൂഖ് ഖാൻ ആരാധകരുടെ ചോദ്യം. ഇന്ത്യയിൽ സിനിമാ വ്യവസായത്തെ പ്രധാനമായും നോർത്ത് സൗത്ത് എന്നിങ്ങനെ രണ്ടായി തിരിച്ചിട്ടുണ്ട്, രണ്ട് ഇടങ്ങളിലും തന്റെ ചിത്രങ്ങൾക്ക് ഒരേ അളവിലുള്ള കളക്ഷൻ നേടാൻ സാധിക്കുന്ന ഇന്ത്യയിലെ ഒരേയൊരു നടൻ പ്രഭാസ് മാത്രമാണെന്ന് തെളിഞ്ഞ കാര്യമായതിനാൽ ആ വിശേഷണത്തിന് അദ്ദേഹം തന്നെ അനുയോജ്യൻ എന്നും പ്രഭാസ് ആരാധകർ വാദിക്കുന്നു.
ഇരുവരുടെയും അവസാന 5 ചിത്രങ്ങളുടെയും കളക്ഷൻ കണക്കാക്കിയാൽ ഷാരൂഖിനാണ് മുൻതൂക്കം എങ്കിലും, പ്രഭാസിന്റെ പാൻ ഇന്ത്യൻ വളർച്ചയ്ക്ക് ഏറെ പ്രായമില്ലതിനാൽ ആ താരതമ്യം എത്രത്തോളം പ്രയോഗികമാണെന്ന് പറയാനാവില്ല. ബാഹുബലിക്ക് ശേഷം വന്ന പല ചിത്രങ്ങളും പ്രഭാസിന് നിരാശ സമ്മാനിച്ചെങ്കിലും സലാർ, കൽക്കി എന്നീ ചിത്രങ്ങൾ പാൻ ഇന്ത്യൻ ലെവലിൽ പ്രേക്ഷകർ സ്വീകരിച്ചു.
പ്രഭാസിന് മേൽപ്പറഞ്ഞ വിശേഷണം തന്റെ ചിത്രത്തിലൂടെ സമ്മാനിച്ചത് സന്ദീപ് റെഡ്ഡി വാങ്കയാണെങ്കിലും, അദ്ദേഹവും ഷാരൂഖ് ഖാന്റെ കടുത്ത ആരാധകനാണെന്നത് പല അഭിമുഖങ്ങളിലും വെളിപ്പെടുത്തിയിട്ടുണ്ട്. പ്രഭാസിനൊപ്പം, പ്രകാശ് രാജ്, തൃപ്തി ധിംരി, വിവേക് ഒബ്റോയ്, കാഞ്ചന എന്നിവർ പ്രധാന വേഷങ്ങളിലെത്തുന്ന സ്പിരിറ്റിൽ പ്രഭാസ് പോലീസ് വേഷത്തിലെത്തും.
