വമ്പൻ വിജയങ്ങൾ നേടിയ എമ്പുരാനും തുടരുമിനും ശേഷം സത്യൻ അന്തിക്കാട് ഒരുക്കുന്ന ഹൃദയപൂർവം എന്ന ചിത്രത്തിന്റെ ഷൂട്ടിലാണ് മോഹൻലാൽ ഇപ്പോൾ. മലയാളത്തിന് പുറത്തും മോഹൻലാലിന്റേതായി റിലീസിന് ചിത്രങ്ങൾ കാത്തിരിക്കുന്നുണ്ട്. ഇതോടൊപ്പം ആരാധകരെ ആവേശത്തിലാഴ്ത്തുന്ന നിരവധി പ്രോജക്ടുകളെ കുറിച്ചുള്ള വാർത്തകളും പുറത്തുവരുന്നുണ്ട്. ഇക്കൂട്ടത്തിൽ സംവിധായകൻ കൃഷാന്ദ് മോഹൻലാലിനെ നായകനാക്കി ഒരു ചിത്രമൊരുക്കുന്നു എന്ന ചില റിപ്പോർട്ടുകൾ നേരത്തെ വന്നിരുന്നു.
ഈ സിനിമയുമായി ബന്ധപ്പെട്ട ചർച്ചകൾ പുരോഗമിക്കുകയാണെന്ന് ചില സിനിമാപ്രവർത്തകരും വെളിപ്പെടുത്തിയിരുന്നു. എന്നാലിപ്പോൾ ഇക്കാര്യം ഔദ്യോഗികമായി സ്ഥിരീകരിച്ചിരിക്കുകയാണ് നിർമാതാവും നടനുമായ മണിയൻപിള്ള രാജു. മോഹൻലാലും കൃഷാന്ദും ഒന്നിക്കുന്ന ചിത്രമാണ് താൻ അടുത്തതായി ചെയ്യാൻ പോകുന്നതെന്നും അതിന്റെ ചർച്ചകളുടെ പ്രാരംഭഘട്ടം കഴിഞ്ഞെന്നും മണിയൻപിള്ള രാജു പറഞ്ഞു. കൗമുദി മൂവീസിന് നൽകിയ അഭിമുഖത്തിലായിരുന്നു അദ്ദേഹത്തിന്റെ പ്രതികരണം.
‘കൃഷാന്ദ് സംവിധാനം ചെയ്യുന്ന മോഹൻലാൽ പടമാണ് അടുത്തതായി ചെയ്യാൻ പോകുന്നത്. അതിന്റെ ഒന്നാം റൗണ്ട് ഡിസ്‌കഷൻ കഴിഞ്ഞു. 18 മുതൽ 45 വയസ് വരെയുള്ളവരാണ് കൂടുതലായും സിനിമ കാണുന്നത്. അവർക്ക് കൃഷാന്ദ് എന്ന ഡയറക്ടറെ വലിയ ഇഷ്ടമാണ്. പുതിയ സംവിധായകർക്കൊപ്പം സിനിമകൾ ചെയ്യണം. മോഹൻലാലും ഇപ്പോൾ പുതിയ സംവിധായകർക്കൊപ്പം സിനിമകൾ ചെയ്യുന്നുണ്ടല്ലോ. പല കാര്യങ്ങളിലും നമ്മൾ മക്കൾ പറയുന്നത് കേൾക്കേണ്ടി വരും. പേടിച്ചിട്ടില്ല അത് ചെയ്യുന്നത്. മക്കളുടെ തലമുറയുടെ ചിന്തകൾ കുറച്ച് കൂടി അഡ്വാൻസ്ഡ് ആണ്. നമ്മളൊക്കെ കുറച്ച് പഴഞ്ചനായി കഴിഞ്ഞു. എനിക്ക് ഇഷ്ടപ്പെട്ട സബ്ജക്ട് കുട്ടികൾക്ക് ഇഷ്ടപ്പെടണമെന്നില്ല. തിരിച്ചും സംഭവിക്കാം,’ മണിയൻപിള്ള രാജു പറഞ്ഞു.
നിരവധി ഹ്രസ്വചിത്രങ്ങളിലൂടെയും ഡോക്യുമെന്ററികളിലൂടെയും ശ്രദ്ധേയനായ കൃഷാന്ദ് വൃത്താകൃതിയുള്ള ചതുരം എന്ന ചിത്രത്തിലൂടെയാണ് ഫീച്ചർ സിനിമാലോകത്തേക്ക് കടന്നുവരുന്നത്. പിന്നീട് ആവാസവ്യൂഹം, പുരുഷപ്രേതം എന്നീ സിനിമകളിലൂടെ പ്രേക്ഷകപ്രീതിയും നിരൂപകശ്രദ്ധയും അദ്ദേഹം ഒരുപോലെ നേടി. അരുൺ ചന്തു സംവിധാനം ചെയ്ത ഗഗനചാരിയിലൂടെ നിർമാണത്തിലേക്കും കൃഷാന്ദ് ചുവടുവെച്ചിരുന്നു. സുങ്ത്സുവിന്റെ സംഘർഷ ഘടന, മസ്തിഷ്‌കമരണം എന്നിവയാണ് കൃഷാന്ദിന്റെ റിലീസിന് ഒരുങ്ങിയിരിക്കുന്ന ചിത്രങ്ങൾ.
