ജയസൂര്യയെ നായകനാക്കി മിഥുൻ മാനുവൽ തോമസ് സംവിധാനം ചെയ്ത കോമഡി ചിത്രമായിരുന്നു ആട്. തിയേറ്ററിൽ വിജയമാകാതെ പോയ ചിത്രത്തിന് ഡിജിറ്റൽ റിലീസിന് ശേഷം വലിയ ആരാധകരാണ് ഉണ്ടായത്. തുടർന്ന് സിനിമയ്ക്കൊരു രണ്ടാം ഭാഗവും സംഭവിച്ചു. ഇപ്പോഴിതാ സിനിമയുടെ മൂന്നാം ഭാഗത്തിനായുള്ള കാത്തിരിപ്പിലാണ് ആരാധകർ. സിനിമയുടെ ട്രെയ്ലർ കഴിഞ്ഞ ദിവസം പുറത്തുവന്നിരുന്നു. ചിത്രം മൂന്നാം ഭാഗം കൊണ്ട് അവസാനിക്കില്ലെന്നും അടുത്ത ഒരു ഭാഗം കൂടി സിനിമയ്ക്ക് ഉണ്ടാകുമെന്നും നിർമാതാവ് വിജയ് ബാബു വെളിപ്പെടുത്തിയിരുന്നു. ഇപ്പോഴിതാ ഇതിൽ പ്രതികരിക്കുകയാണ് സംവിധായകൻ മിഥുൻ മാനുവൽ തോമസ്.
‘ചിത്രീകരണവും കാര്യങ്ങളും നീണ്ടുപോയപ്പോൾ ത്രീഡി എന്ന പ്ലാൻ നടക്കാതെ വന്നു. ആട് ഫ്രാഞ്ചൈസ് രണ്ട് ഭാഗങ്ങളായി അവസാനിപ്പിച്ച് ഈ ചിത്രങ്ങളുടെ ആദ്യഭാഗം എന്ന രീതിയിൽ ഒരു ചിത്രം ചെയ്യാമെന്ന് കരുതിയാണ് ഇറങ്ങിത്തിരിച്ചത്. അടുത്ത ഭാഗത്തിലേക്ക് വഴിയൊരുക്കുന്ന ചെറിയൊരു ആമുഖം മാത്രമാണിപ്പോൾ ഷൂട്ട് ചെയ്തത്. ആട് -3 യുടെ രണ്ടാംഭാഗത്തിന്റെ തിരക്കഥ പൂർത്തിയായിട്ടുണ്ട്. ആദ്യഭാഗം ഇഷ്ടപ്പെട്ടു എന്നൊരു ഗ്രീൻ സിഗ്നൽ പ്രേക്ഷകർ തന്നാൽ രണ്ടാം ഭാഗം തുടങ്ങുന്നതായിരിക്കും’, മിഥുന്റെ വാക്കുകൾ.ഒരു എപിക്-ഫാന്റസി ചിത്രമായാകും ആട് 3 എന്ന് നേരത്തെ സംവിധായകൻ വെളിപ്പെടുത്തിയിരുന്നു. ഇതിനോട് ചേർന്ന് നിൽക്കുന്നതാണ് സിനിമയുടെ പോസ്റ്ററുകളും ഇപ്പോൾ ഇറങ്ങിയ ട്രെയ്ലറും. ട്രെയിലറിലെ ഡയലോഗുകളായും എഡിറ്റിംഗും കയ്യടി നേടുന്നുണ്ട്.
മറ്റ് രണ്ട് ഭാഗങ്ങളെക്കാൾ ചിത്രം ഹിറ്റടിക്കുമെന്നാണ് ആരാധകർ പറയുന്നത്. മികച്ച വരവേൽപ്പാണ് ട്രെയിലറിന് ലഭിക്കുന്നത്. ആട് 3 ഒരു ടൈം ട്രാവൽ ചിത്രമായിരിക്കുമെന്നാണ് ആദ്യം ഇറങ്ങിയ പോസ്റ്ററുകൾ നൽകുന്ന സൂചനകൾ. ആടിന്റെ രണ്ടു ഭാഗങ്ങളിൽ ഒന്നാം ഭാഗം തിയേറ്ററിൽ വിജയമാകാതെ ഡിജിറ്റൽ റിലീസിന് ശേഷമാണ് വലിയ ആരാധകവൃന്ദം ഉണ്ടായത്. മലയാളത്തിലെ ഓൾ ടൈം ബ്ലോക്ക്ബസ്റ്റർ ഹിറ്റായ 2018 , അമ്പതു കോടി ക്ലബിൽ ഇടം പിടിച്ച മാളികപ്പുറം, രേഖാചിത്രം തുടങ്ങിയവയും നിർമ്മിച്ചിട്ടുള്ള കാവ്യാ ഫിലിം കമ്പനി ആട് ഫ്രാൻഞ്ചൈസിലേക്കു കടന്ന് വന്നതോടെ ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ ഏറെ വർധിച്ചിട്ടുണ്ട്.
