തമിഴിലെ ഏറ്റവും ജനപ്രീതി നേടിയ ഹൊറർ കോമഡി സിനിമ പാരമ്പരയായ കാഞ്ചനക്ക് 4 ഭാഗം വരുന്നു. രാഘവ ലോറൻസ് സംവിധാനം ചെയ്ത് പ്രധാന വേഷത്തിൽ അഭിനയിച്ച മൂന്ന് ചിത്രങ്ങളും വമ്പൻ ഹിറ്റായിരുന്നു. ചിത്രത്തിന്റെ പ്രഖ്യാപനം തന്റെ പുതിയ വീട്ടിൽ വെച്ചായിരുന്നു ലോറൻസ് നടത്തിയത്. ഒപ്പം തന്റെ വീട് താൻ പഠിപ്പിക്കുന്ന കുട്ടികൾക്ക് വേണ്ടിയുള്ള സ്കൂളാക്കി മാറ്റാൻ പോകുകയാണ് എന്നുകൂടി രാഘവ ലോറൻസ് വെളിപ്പെടുത്തിയിട്ടുണ്ട് വിഡിയോയിൽ. താൻ സ്വന്തമാക്കുന്ന ആദ്യ വീടാണ് ഇതെന്നും, ഇതുവരെ താൻ താമസിച്ചതെല്ലാം വാടക വീടുകളിലായിരുന്നുവെന്നും വിഡിയോയിൽ രാഘവ ലോറൻസ് പറയുന്നു.
കാഞ്ചന 4ൽ പൂജ ഹെഗ്ഡെയാണ് രാഘവ ലോറൻസിന്റെ നായികയാകുന്നത് എന്നാണ് റിപ്പോർട്ടുകൾ. ഇരുവർക്കുമൊപ്പം ബോളിവുഡ് താരം നോറ ഫെറ്റേഹിയും ഒരു സുപ്രധാന വേഷത്തിൽ പ്രത്യേക്ഷപ്പെടും. മുൻ ചിത്രങ്ങൾപോലെ തന്നെ നാലാം ഭാഗവും സംവിധാനം ചെയ്യുക രാഘവ ലോറൻസ് തന്നെയാവും.
ടൂറിസ്റ്റ് ഫാമിലി എന്ന ചിത്രത്തിലൂടെ ശ്രദ്ധേയനായ ബാലതാരം കമലേഷ് ജഗനും ചിത്രത്തിൽ ഒരു വേഷം ചെയ്യുന്നുണ്ട്. നിരവധി ചാരിറ്റി പ്രവർത്തനങ്ങളിലൂടെ മുൻപും രാഘവ ലോറൻസ് വാർത്തകളിൽ ഇടം നേടിയിട്ടുണ്ട്. നിലവിൽ കുട്ടികൾക്ക് വേണ്ടി വാങ്ങിയിരിക്കുന്നു പുതിയ ഭവനം കാഞ്ചന 4 ന് വേണ്ടി തനിക്ക് അഡ്വാൻസ് ലഭിച്ച പണം കൊണ്ട് വാങ്ങിയതാണ് എന്നും രാഘവ ലോറൻസ് കൂട്ടിച്ചേർത്തു.
