പ്രായത്തെ വെല്ലുന്ന ലുക്കിലും കഥാപാത്രങ്ങളിലെ വൈവിധ്യം കൊണ്ടും മലയാളികളെ വിസ്മയിപ്പിക്കാറുള്ള മമ്മൂട്ടി, വരാനിരിക്കുന്ന ചിത്രങ്ങളിൽ വലിയൊരു സർപ്രൈസ് ഒരുക്കുന്നുണ്ടോ എന്ന ആവേശത്തിലാണ് ആരാധകർ. പ്രശസ്ത ചലച്ചിത്ര നിരൂപക അനുപമ ചോപ്രയ്ക്ക് നൽകിയ ഏറ്റവും പുതിയ അഭിമുഖത്തിലെ മമ്മൂട്ടിയുടെ വാക്കുകളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
അഭിമുഖത്തിന്റെ അവസാന ഭാഗത്ത് “എപ്പോഴെങ്കിലും ഞാൻ ഒരു വാമ്പയർ വേഷം ചെയ്യുന്നത് ആലോചിച്ചു നോക്കിയിട്ടുണ്ടോ?” എന്ന് മമ്മൂട്ടി തന്നെ അപ്രതീക്ഷിതമായി ചോദിക്കുകയായിരുന്നു. ഈ ചോദ്യം കേട്ട് അമ്പരന്ന അനുപമ ചോപ്ര, അങ്ങനെയൊന്ന് സംഭവിക്കുമോ എന്ന് ആകാംക്ഷയോടെ ചോദിച്ചപ്പോൾ “സസ്പെൻസ്” എന്നായിരുന്നു മമ്മൂട്ടിയുടെ മറുപടി. അത്തരമൊരു വേഷം താങ്കൾ ചെയ്താൽ അത് ഗംഭീരമായിരിക്കുമെന്ന് അവർ കൂട്ടിച്ചേർത്തപ്പോൾ “ഇൻഷാ അള്ളാ…” എന്ന് മമ്മൂട്ടി ചിരിച്ചുകൊണ്ട് പ്രതികരിക്കുകയും ചെയ്തു.
അഞ്ചു പതിറ്റാണ്ടിലേറെയായി സിനിമയിലുള്ള താരം സമീപകാലത്ത് ഭ്രമയുഗം, കാതൽ തുടങ്ങിയ ചിത്രങ്ങളിലൂടെ വേറിട്ട പരീക്ഷണങ്ങളാണ് നടത്തിക്കൊണ്ടിരിക്കുന്നത്. അതുകൊണ്ടുതന്നെ താരത്തിന്റെ ഈ ‘വാമ്പയർ’ പരാമർശം വെറുമൊരു തമാശയല്ലെന്നും അണിയറയിൽ എന്തോ വലുത് ഒരുങ്ങുന്നുണ്ടെന്നുമാണ് ആരാധകരുടെ വിലയിരുത്തൽ. രാഹുൽ സദാശിവൻ ഒരുക്കുന്ന പുതിയ ചിത്രത്തിലോ അല്ലെങ്കിൽ ലോകേഷ് കനകരാജിന്റെ ‘ലോകി സിനിമാറ്റിക് യൂണിവേഴ്സിലോ’ ഇതുമായി ബന്ധപ്പെട്ട എന്തെങ്കിലും സർപ്രൈസ് ഉണ്ടാകുമെന്നും സോഷ്യൽ മീഡിയയിൽ ചർച്ചകൾ കൊഴുക്കുന്നുണ്ട്. നിലവിൽ ‘പേട്രിയറ്റ്’ എന്ന ചിത്രമാണ് മമ്മൂട്ടിയുടേതായി പുറത്തിറങ്ങാനിരിക്കുന്നത്. ഇതിനിടയിലാണ് ഇക്ക തന്ന ഈ ‘സിഗ്നൽ’ സിനിമാ ലോകത്ത് വലിയ ചർച്ചയാകുന്നത്.
