ആദിത്യ ധറിന്റെ സംവിധാനത്തിൽ രൺവീർ സിംഗ് നായകനായെത്തിയ സ്പൈ ആക്ഷൻ ത്രില്ലർ ‘ധുരന്ധർ 2’ ഇന്ത്യൻ സിനിമാ ചരിത്രത്തിൽ പുതിയ വിസ്മയങ്ങൾ തീർക്കുന്നു. റിലീസ് ചെയ്ത് വെറും രണ്ട് ദിവസത്തിനുള്ളിൽ ആഗോളതലത്തിൽ 359.39 കോടി രൂപയാണ് ചിത്രം വാരിക്കൂട്ടിയത്. ഇന്ത്യയിൽ നിന്ന് മാത്രം 269.39 കോടി രൂപ ഗ്രോസ് കളക്ഷൻ നേടിയപ്പോൾ വിദേശ വിപണികളിൽ നിന്ന് 90 കോടി രൂപയും ചിത്രം സ്വന്തമാക്കി. ആദ്യ ഭാഗം നേരിട്ട മുൻവിധികളെ കാറ്റിൽപ്പറത്തി വൻ വിജയമായതുപോലെ, രണ്ടാം ഭാഗവും ബോക്സ് ഓഫീസിൽ തരംഗമാവുകയാണ്.
ഏകദേശം 250 മുതൽ 275 കോടി രൂപ വരെ ബജറ്റിൽ ഒരുങ്ങിയ ചിത്രം രണ്ടാം ദിനം പിന്നിടുമ്പോൾ തന്നെ മുടക്കുമുതൽ മറികടക്കുന്ന പ്രകടനമാണ് കാഴ്ചവയ്ക്കുന്നത്. ട്രാക്കിംഗ് സൈറ്റായ സ്കിനിൽക്കിന്റെ കണക്കുകൾ പ്രകാരം 53,052 ഷോകളാണ് ഇതുവരെ പൂർത്തിയായത്. രൺവീർ സിംഗിന്റെ കരിയറിലെ തന്നെ ഏറ്റവും മികച്ച പ്രകടനങ്ങളിലൊന്നായി വിലയിരുത്തപ്പെടുന്ന ഈ ചിത്രം, വിമർശകരെപ്പോലും അത്ഭുതപ്പെടുത്തിക്കൊണ്ടാണ് തിയറ്ററുകളിൽ മുന്നേറുന്നത്.
ആദിത്യ ധർ തന്നെ രചനയും നിർവഹിച്ച ഈ ചിത്രത്തിൽ വലിയൊരു താരനിരയാണ് അണിനിരക്കുന്നത്. അക്ഷയ് ഖന്ന, സഞ്ജയ് ദത്ത്, അർജുൻ രാംപാൽ, ആർ. മാധവൻ എന്നിവരുടെ കരുത്തുറ്റ പ്രകടനങ്ങൾ ചിത്രത്തിന് മുതൽക്കൂട്ടായി. സാറ അർജുൻ നായികയായെത്തിയ ഈ സ്പൈ ത്രില്ലർ വരും ദിവസങ്ങളിൽ കൂടുതൽ റെക്കോർഡുകൾ തകർക്കുമെന്നാണ് സിനിമാ ലോകത്തെ വിലയിരുത്തൽ.
