ചിരഞ്ജീവിയെ നായകനാക്കി അനിൽ രവിപുടി ഒരുക്കുന്ന കോമഡി എന്റർടൈനർ ചിത്രമാണ് ‘മന ശങ്കര വര പ്രസാദ് ഗാരു’. ഒരിടവേളക്ക് ശേഷം പുറത്തിറങ്ങുന്ന ചിരഞ്ജീവിയുടെ കോമഡി ഴോണർ ചിത്രം കൂടിയാണിത്. വലിയ പ്രതീക്ഷയോടെ ആരാധകർ കാത്തിരിക്കുന്ന സിനിമ വമ്പൻ വിജയമാണ് ബോക്സ് ഓഫീസിൽ നിന്നും നേടിയത്. ഇപ്പോഴിതാ സിനിമ ഒടിടിയിലേക്ക് എത്തുകയാണെന്നാണ് പുതിയ റിപ്പോർട്ട്. ജനുവരി 11 മുതൽ മന ശങ്കര വര പ്രസാദ് ഗാരു സ്ട്രീമിങ് ആരംഭിക്കുമെന്നാണ് റിപ്പോർട്ട്. സീ 5 ലൂടെയാണ് സിനിമ പ്രേക്ഷകർക്ക് മുന്നിലെത്തുന്നത്. ചിരഞ്ജീവിയുടെ കംബാക്ക് ആണ് ചിത്രമെന്നും വളരെകാലത്തിന് ശേഷം നടനെ പക്കാ എനർജിയിൽ കാണാനായി എന്നുമാണ് അഭിപ്രായങ്ങൾ.
അനിൽ രവിപുടി പതിവ് പോലെ ഹ്യൂമറും ഫാമിലി ഇമോഷനും കൊണ്ട് സിനിമ വിജയിപ്പിച്ചു എന്നും ചിരഞ്ജീവി കലക്കിയെന്നുമാണ് മറ്റൊരു കമന്റ്. ആഗോള ബോക്സ് ഓഫീസിൽ നിന്നും 400 കോടിക്ക് മുകളിലായിരുന്നു സിനിമയുടെ നേട്ടം. സീ നെറ്റ്വര്ക്ക് ആണ് ചിത്രത്തിന്റെ ഡിജിറ്റല്, സാറ്റലൈറ്റ് അവകാശങ്ങള് ഒരുമിച്ച് വാങ്ങിയിരിക്കുന്നത്. വന് പ്രതിഫലമാണ് ചിത്രത്തില് ചിരഞ്ജീവി വാങ്ങുന്നത്. 70 കോടിയാണ് ചിത്രത്തില് അദ്ദേഹത്തിന്റെ പ്രതിഫലം. നയന്താര നായികയാവുന്ന ചിത്രത്തില് കാതറിന് ട്രെസയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
സിനിമയിൽ നായികാവേഷത്തിൽ എത്തിയ നയൻതാരയുടെ പ്രതിഫലം ആറ് കോടി രൂപയാണ്. ചിത്രത്തിൽ നടൻ വെങ്കടേഷ് കാമിയോ വേഷത്തിൽ എത്തിയിരുന്നു. വെങ്കടേഷിന്റെയും ചിരഞ്ജീവിയുടെയും സീനുകൾക്ക് വലിയ കയ്യടികളാണ് ലഭിച്ചത്. ചിത്രത്തിൽ അഭിനയിക്കാൻ 9 കോടി ആയിരുന്നു വെങ്കടേഷിന്റെ പ്രതിഫലം. തുടർച്ചയായി വിജയങ്ങളിലൂടെ മുന്നേറുന്ന സംവിധായകനാണ് അനിൽ രവിപുടി. മന ശങ്കര വര പ്രസാദ് ഗാരു ഒരുക്കാനായി 25 കോടിയാണ് സംവിധായകൻ പ്രതിഫലമായി കൈപ്പറ്റിയത്. ചിത്രത്തിന്റെ നേരത്തെ പുറത്തെത്തിയ ആദ്യ ഗാനം, മീശല പിള്ള യുട്യൂബില് തരംഗം തീര്ത്തിരുന്നു. ഷൈന് സ്ക്രീന്സ്, ഗോള്ഡ് ബോക്സ് എന്റര്ടെയ്ന്മെന്റ് എന്നീ ബാനറുകളില് സാഹു ഗരപതി, സുഷ്മിത കോനിഡെല എന്നിവരാണ് ചിത്രം നിര്മ്മിച്ചിരിക്കുന്നത്.
