സൂപ്പർ ഹിറ്റ് ചിത്രം ‘ഉണ്ട’യ്ക്ക് ശേഷം മെഗാസ്റ്റാർ മമ്മൂട്ടിയും സംവിധായകൻ ഖാലിദ് റഹ്മാനും വീണ്ടും ഒന്നിക്കുന്നു. ഗാങ്സ്റ്റർ ആക്ഷൻ-കോമഡി പശ്ചാത്തലത്തിൽ ഒരുങ്ങുന്ന ‘മട്ടാഞ്ചേരി മാഫിയ’ എന്ന ചിത്രത്തിന്റെ ടൈറ്റിൽ പോസ്റ്റർ പുറത്തുവിട്ടു. മമ്മൂട്ടിയോടൊപ്പം യുവതാരങ്ങളായ ആസിഫ് അലിയും നെസ്ലനും പ്രധാന വേഷങ്ങളിൽ എത്തുന്നു എന്നതാണ് ചിത്രത്തിന്റെ മറ്റൊരു വലിയ പ്രത്യേകത.
‘അനുരാഗ കരിക്കിൻ വെള്ളം’, ‘തല്ലുമാല’ തുടങ്ങിയ ചിത്രങ്ങളിലൂടെ തന്റേതായ ശൈലി തെളിയിച്ച ഖാലിദ് റഹ്മാൻ, മമ്മൂട്ടിയുടെ കരിയറിലെ വ്യത്യസ്തമായൊരു മാസ് കഥാപാത്രത്തെയാകും ഈ ചിത്രത്തിലൂടെ അവതരിപ്പിക്കുക.
പ്ലാൻ ബി മോഷൻ പിക്ചേഴ്സിന്റെയും യൂണിവേഴ്സൽ സിനിമസിന്റെയും ബാനറിൽ ബി. രാകേഷും ഖാലിദ് റഹ്മാനും ചേർന്നാണ് ചിത്രം നിർമ്മിക്കുന്നത്.നിയോഗ് കൃഷ്ണ, ഷറഫു സുഹാസ്, തശ്രീഖ് അബ്ദുൽ സലാം എന്നിവർ ചേർന്നാണ് ചിത്രത്തിന് തിരക്കഥയൊരുക്കുന്നത്. ജിംഷി ഖാലിദിന്റെ ക്യാമറയും നൗഫൽ അബ്ദുള്ളയുടെ എഡിറ്റിംഗും ചിത്രത്തിന് കരുത്തേകും. സംഗീത സംവിധാനം റെക്സ് വിജയനും പശ്ചാത്തല സംഗീതം സുഷിൻ ശ്യാമുമാണ് നിർവ്വഹിക്കുന്നത്. മലയാള സിനിമയിലെ മുൻനിര സാങ്കേതിക പ്രവർത്തകർ അണിനിരക്കുന്ന ഈ ചിത്രം ഒരു ഗംഭീര ഗാങ്സ്റ്റർ എന്റർടെയ്നറായിരിക്കും എന്ന പ്രതീക്ഷയിലാണ് സിനിമാ പ്രേമികൾ.
