ഇന്ത്യൻ സംഗീത ലോകത്തെ ഒന്നടങ്കം അമ്പരപ്പിച്ചുകൊണ്ടായിരുന്നു പ്രശസ്ത പിന്നണി ഗായകൻ അരിജിത് സിങ് വിരമിക്കൽ പ്രഖ്യാപിച്ചത്. ഇനിമുതൽ പുതിയ സിനിമകളിൽ പിന്നണി ഗായകനായി കരാറുകളിൽ ഒപ്പിടില്ലെന്ന് അദ്ദേഹം വ്യക്തമാക്കിയിരുന്നു. ഈ വാർത്തയിൽ കടുത്ത നിരാശയാണ് അദ്ദേഹത്തിന്റെ ആരാധകർക്ക് ഉണ്ടായത്. ഇപ്പോഴിതാ ആരാധകർക്ക് ആശ്വാസമേകുന്ന വാർത്തയുമായി എത്തുകയാണ് അരിജിത് സിങ്. താൻ പുതുതായി പാട്ടുകൾ എടുകുന്നില്ലെങ്കിലും നിരവധി പാട്ടുകൾ തന്റേതായി പുറത്തിറങ്ങാനുണ്ടെന്ന് അദ്ദേഹം പറഞ്ഞു. ട്വിറ്ററിൽ പോസ്റ്റ് പങ്കുവെച്ചുകൊണ്ടാണ് പ്രതികരണം.
‘ഈ സന്ദേശം എന്റെ ശ്രോതാക്കൾക്ക് വേണ്ടിയുള്ളതാണ്. എന്റെ ശ്രോതാവല്ലെങ്കിൽ ദയവ് ചെയ്ത് വായിക്കരുത് സ്വൈപ്പ് ചെയ്ത് പോവണം. ഇതൊരു അപേക്ഷയാണ്. ഹലോ പ്രിയപ്പെട്ടവരേ! എനിക്ക് നിങ്ങളെല്ലാവരെയും വലിയ ഇഷ്ടമാണെന്ന് പറയാൻ ഞാൻ ആഗ്രഹിക്കുന്നു. ഈ ക്രൂരമായ ലോകത്ത് നിങ്ങൾ കാണിക്കുന്ന ദയയ്ക്ക് ഒത്തിരി നന്ദി. ഞാൻ പുതിയ ജോലികൾ സ്വീകരിക്കുന്നത് അവസാനിപ്പിച്ചുവെങ്കിലും, ഇനിയും പാടാനുള്ള പാട്ടുകൾ ഒട്ടും കുറവല്ല എന്ന് നിങ്ങൾക്കറിയാമല്ലോ. എനിക്ക് ധാരാളം ഗാനങ്ങൾ പൂർത്തിയാക്കാനുണ്ട്. പൂർത്തിയാകാത്ത നിരവധി ഗാനങ്ങളുണ്ട്.
ഈ വർഷമുടനീളം അതുണ്ടാവും. ചിലപ്പോൾ അടുത്തവർഷവും അത് തുടർന്നേക്കും. സമാധാനത്തോടെ ഇരിക്കുക. ഈ പ്ലാറ്റ്ഫോമിൽനിന്ന് പുറത്തുകടക്കാൻ ശ്രമിക്കുക. നിങ്ങളുടെ ശരീരത്തിൽനിന്ന് സ്പൈക്ക് പ്രോട്ടീനുകളെ നീക്കം ചെയ്യുക, 5ജി ഉപേക്ഷിക്കുക, വായിക്കുക, സ്നേഹിക്കുക, ധ്യാനിക്കുക. ജയ് ദേവി!”,’ അരിജിത് സിങ് കുറിച്ചു. ബോളിവുഡിലെ ഏറ്റവും തിരക്കേറിയ യുവ ഗായകനായ അരിജിത് സിംഗിന്റെ വിരമിക്കല് ആരാധകരെ ഞെട്ടിച്ചിരിക്കുകയാണ്. ഹിന്ദിയിലും ബംഗാളിയിലുമാണ് അരിജിത് സിംഗ് ഏറ്റവും കൂടുതല് സിനിമാഗാനങ്ങള് ആലപിച്ചിട്ടുള്ളത്. തമിഴിലും തെലുങ്കിലും മലയാളത്തിലുമെല്ലാം അദ്ദേഹം ഗാനങ്ങള് ആലപിച്ചിട്ടുണ്ട്. 2009ല് പിന്നണി ഗാനരംഗത്തേക്ക് കടന്നുവന്ന അരിജിത് സിംഗ് അതിനുമുന്പ് റിയാലിറ്റി ഷോയിലൂടെ ആസ്വാദകര്ക്ക് സുപരിചിതനായിരുന്നു.
