ലോകേഷ് കനഗരാജിന്റെ സംവിധാനത്തിൽ രജനികാന്ത് നായകനാകുന്ന കൂലിയിലെ ആദ്യ ഗാനം എത്തി. ചികിട്ട് എന്ന ഗാനത്തിന് സംഗീതം നൽകി ആലപിച്ചത് അനിരുദ്ധ് രവിചന്ദർ ആണ്. സൺ ടീവീയുടെ യൂട്യൂബ് ചാനലിലൂടെ പുറത്തുവിട്ട ഗാനത്തിൽ കൂലിയിലെ വീഡിയോ ഗാനത്തിന്റെ വളരെ കുറച്ചു രംഗങ്ങൾ മാത്രമാണ് ഉൾപ്പെടുത്തിയിട്ടുള്ളത്. വീഡിയോ ഗാനത്തിൽ അനിരുദ്ധ് രവിചന്ദർ, സാൻഡി മാസ്റ്റർ (ഡാൻസ് മാസ്റ്റർ), ടി രാജേന്ദ്രൻ എന്നിവരും പ്രത്യക്ഷപ്പെടുന്നുണ്ട്. ഗാനത്തിന്റെ പ്രമോ കട്ട് റിലീസ് ചെയ്ത് 6 മാസത്തിന് ശേഷമാണ് മുഴുനീള ഗാനം എത്തുന്നത് എന്നത് ശ്രദ്ധേയമാണ്. ഗാനരംഗത്തിൽ മൂവരും ചേർന്ന് നൃത്തം ചെയ്യുന്നുണ്ട്.
അനിരുദ്ധിനൊപ്പം ടി രാജേന്ദ്രനും ഗാനത്തിലെ ഒരു പ്രധാന ഭാഗം ആലപിച്ചിട്ടുണ്ട്. ടി രാജേന്ദ്രന്റെ ഒരു പഴയ അഭിമുഖത്തിലെ പ്രസക്ത ഭാഗങ്ങൾ മിക്സ് ചെയ്ത് ഗാനത്തോടൊപ്പം ചേർക്കുകയായിരുന്നു അനിരുദ്ധ്. റിലീസ് ചെയ്ത് ഒരു മണിക്കൂറിനകം എട്ട് ലക്ഷം കാഴ്ചക്കാരെ നേടാൻ ചികിട്ട് ഗാനത്തിന് കഴിഞ്ഞിട്ടുണ്ട്. ലിയോ എന്ന ബ്ലോക്ക്ബസ്റ്റർ ചിത്രത്തിന് ശേഷം ലോകേഷ് കനഗരാജ് സംവിധാനം ചെയ്യുന്ന കൂലിയിൽ രജനികാന്തിനൊപ്പം നാഗാർജുന, ഉപേന്ദ്ര, സൗബിൻ ഷാഹിർ, സത്യരാജ്, ശ്രുതി ഹാസൻ എന്നിവരും മറ്റ് പ്രധാന വേഷങ്ങളെ അവതരിപ്പിക്കുന്നുണ്ട്. കൂടാതെ ബോളിവുഡ് താരം ആമിർ ഖാനും ചിത്രത്തിലൊരു അതിഥി വേഷം ചെയ്യുന്നുണ്ടെന്നാണ് റിപ്പോർട്ടുകൾ.
