മലയാള സിനിമയിൽ വലിയ തരംഗമായി മാറിയ ‘വാഴ’ ഫ്രാഞ്ചൈസിയുടെ മൂന്നാം ഭാഗം ഔദ്യോഗികമായി പ്രഖ്യാപിച്ചിരിക്കുകയാണ്. ആദ്യ രണ്ട് ഭാഗങ്ങളുടെയും രചയിതാവും സഹനിർമ്മാതാവുമായ വിപിൻ ദാസാണ് സോഷ്യൽ മീഡിയയിലൂടെ ഈ സന്തോഷവാർത്ത പങ്കുവെച്ചത്. ആദ്യ രണ്ട് ഭാഗങ്ങളും പ്രധാനമായും ആൺകുട്ടികളുടെ കഥയും അവരുടെ സൗഹൃദവുമാണ് പറഞ്ഞതെങ്കിൽ, ‘വാഴ 3’ പെൺകുട്ടികളുടെ ജീവിതത്തിലേക്കാണ് ക്യാമറ തിരിക്കുന്നത്. ‘ബയോപിക് ഓഫ് എ ബില്യൺ ഗേൾസ്’ എന്ന ടാഗ്ലൈനോടെ എത്തുന്ന ഈ ചിത്രം ഫ്രാഞ്ചൈസിയിൽ ഒരു വലിയ മാറ്റത്തിന് തുടക്കം കുറിക്കുമെന്ന് നിസ്തർക്കമാണ്.
ഓരോ ഭാഗത്തിലും സംവിധായകർ മാറുന്ന പതിവ് ഇത്തവണയും തുടരുന്നുണ്ട്. വിപിൻ ദാസിന്റെ സംവിധാന സഹായിയായിരുന്ന വിശ്വൻ ശ്രീജിത്താണ് മൂന്നാം ഭാഗം സംവിധാനം ചെയ്യുന്നത്. ചിത്രത്തിന്റെ രചന വിപിൻ ദാസ് തന്നെ നിർവ്വഹിക്കും. ഹാരിസ് ദേശം, പി ബി അനീഷ്, സാഹു ഗരപതി, ആദർശ് നാരായൺ എന്നിവരും ഐക്കൺ സ്റ്റുഡിയോസും ചേർന്നാണ് ചിത്രം നിർമ്മിക്കുന്നത്. അങ്കിത് മേനോൻ സംഗീതവും സർക്കാസനം പോസ്റ്റർ ഡിസൈനും നിർവ്വഹിക്കുന്നു. തങ്ങൾ പ്രതീക്ഷിക്കാത്ത ഉയരങ്ങളിലേക്ക് ഈ ഫ്രാഞ്ചൈസി വളർന്നതിൽ വിപിൻ ദാസ് പ്രേക്ഷകർക്ക് നന്ദി രേഖപ്പെടുത്തി.
പുതിയ പ്രതിഭകളെ സിനിമയ്ക്ക് പരിചയപ്പെടുത്തുക എന്ന ലക്ഷ്യത്തോടെയാണ് ‘വാഴ’ ആരംഭിച്ചതെന്നും ആ നയം മൂന്നാം ഭാഗത്തിലും തുടരുമെന്നും വിപിൻ ദാസ് വ്യക്തമാക്കി. അഭിനയിക്കാനും സാങ്കേതിക മേഖലയിൽ പ്രവർത്തിക്കാനും ആഗ്രഹിക്കുന്ന പുതിയ തലമുറയ്ക്കായി വാതിലുകൾ എപ്പോഴും തുറന്നിട്ടിരിക്കുമെന്ന് അദ്ദേഹം ഉറപ്പുനൽകി. തൽക്കാലം ആരും പോർട്ട്ഫോളിയോകൾ അയക്കേണ്ടതില്ലെന്നും, തിരക്കഥ പൂർത്തിയായ ശേഷം കൃത്യമായ ഓഡിഷൻ പ്രഖ്യാപിക്കുമെന്നും അദ്ദേഹം അറിയിച്ചു. ചിത്രത്തിന്റെ ചിത്രീകരണം അടുത്ത വർഷം ആരംഭിക്കാനാണ് അണിയറപ്രവർത്തകർ തീരുമാനിച്ചിരിക്കുന്നത്.
