സുരേഷ് ഗോപി ആരാധകർ ആവേശത്തോടെ കാത്തിരിക്കുന്ന മാസ് ആക്ഷൻ ചിത്രം ‘ഒറ്റക്കൊമ്പന്റെ’ കരുത്തുറ്റ ഫസ്റ്റ് ലുക്ക് പോസ്റ്റർ പുറത്തിറങ്ങി. ഈസ്റ്റർ ദിനാഘോഷങ്ങളുടെ ഭാഗമായി പ്രേക്ഷകർക്ക് ആശംസകൾ നേർന്നുകൊണ്ടാണ് ചിത്രത്തിന്റെ അണിയറപ്രവർത്തകർ ഈ സർപ്രൈസ് പുറത്തുവിട്ടത്. “വീണുപോയാലും ഞാൻ വീണ്ടും ഉയർത്തെഴുന്നേൽക്കും” എന്ന വാചകത്തോടെ പുറത്തുവന്ന പോസ്റ്ററിൽ സുരേഷ് ഗോപിയുടെ അതിശക്തമായ മാസ്സ് ലുക്കാണ് അവതരിപ്പിച്ചിരിക്കുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിച്ച് നവാഗതനായ മാത്യൂസ് തോമസ് സംവിധാനം ചെയ്യുന്ന ഈ ചിത്രം വലിയ മുതൽമുടക്കിലാണ് ഒരുങ്ങുന്നത്.
ഷിബിൻ ഫ്രാൻസിസ് തിരക്കഥയൊരുക്കുന്ന ചിത്രത്തിൽ സുരേഷ് ഗോപിക്കൊപ്പം അഭിനയയാണ് നായികയായി എത്തുന്നത്. ലാൽ, ചെമ്പൻ വിനോദ് ജോസ്, വിജയരാഘവൻ, ലാലു അലക്സ്, കബീർ ദുഹാൻ സിംഗ്, ജോണി ആന്റണി, മേഘന രാജ് തുടങ്ങി എഴുപതോളം പ്രമുഖ താരങ്ങളും നിരവധി പുതുമുഖങ്ങളും ചിത്രത്തിൽ അണിനിരക്കുന്നുണ്ട്. സുരേഷ് ഗോപി എന്ന താരത്തിൽ നിന്നും നടനിൽ നിന്നും പ്രേക്ഷകർ ആഗ്രഹിക്കുന്ന എല്ലാ മാസ്സ് ഘടകങ്ങളും കോർത്തിണക്കിയാണ് ചിത്രം അണിയറയിൽ ഒരുങ്ങുന്നത്. ചിത്രത്തിന്റെ ലൊക്കേഷൻ വീഡിയോകൾക്ക് നേരത്തെ തന്നെ വലിയ സ്വീകാര്യത ലഭിച്ചിരുന്നു.
ഷാജികുമാർ ഛായാഗ്രഹണം നിർവഹിക്കുന്ന ചിത്രത്തിന് ഹർഷവർദ്ധൻ രമേശ്വർ ആണ് സംഗീതം പകരുന്നത്. വമ്പൻ ആക്ഷൻ രംഗങ്ങൾക്കായി കലയ് കിങ്സൺ, ഫീനിക്സ് പ്രഭു, സ്റ്റണ്ട് ശിവ, സിൽവ എന്നിവരടങ്ങുന്ന വലിയൊരു ടീം തന്നെ പ്രവർത്തിക്കുന്നുണ്ട്. ‘ഒറ്റക്കൊമ്പൻ’ കൂടാതെ ജയസൂര്യയുടെ ‘കത്തനാർ’, എസ്.ജെ. സൂര്യയുടെ ‘കില്ലർ’, മോഹൻലാലിന്റെ ‘L367’ എന്നിങ്ങനെ വമ്പൻ പ്രോജക്റ്റുകളാണ് ഗോകുലം മൂവീസിന്റെ ബാനറിൽ ഇപ്പോൾ ഒരുങ്ങിക്കൊണ്ടിരിക്കുന്നത്. ആരാധകരുടെ കാത്തിരിപ്പിന് വിരാമമിട്ട് ‘ഒറ്റക്കൊമ്പൻ’ ഈ വർഷം തന്നെ തീയേറ്ററുകളിൽ എത്തും.
