ആരാധകർ ഏറെയുള്ള നടിയാണ് റെജീന കസാൻഡ്ര. 2005-ൽ കണ്ട നാൾ മുതൽ എന്ന തമിഴ് ചിത്രത്തിലൂടെയാണ് റെജീന അഭിനയരംഗത്തേക്ക് എത്തുന്നത്. പിന്നീട് കന്നഡയിലും തെലുങ്കിലും ഹിന്ദിയിലും മലയാളത്തിൽ വരെ നടി അഭിനയിച്ചു. ഇപ്പോഴിതാ ബോളയെപ്പോടിൽ നിന്ന് തനിക്ക് വിവേചനം നേരിടേണ്ടി വന്നിട്ടുണ്ടെന്ന് പറയുകയാണ് നടി. അപമാനകരമായ രീതിയിൽ തന്നോട് പെരുമാറിയിട്ടുണ്ടെന്നും വാക്കുകൾ കൊണ്ട് മാത്രമല്ല, പ്രവൃത്തി കൊണ്ടും തന്നെ അവഗണിച്ചിട്ടുണ്ടെന്നും നടി പറഞ്ഞു.
തെന്നിന്ത്യൻ സിനിമാ രംഗത്ത് നിന്നും വരുന്ന അഭിനേതാക്കളോട് ബോളിവുഡിൽ വേർതിരിവുണ്ട്. ഞാൻ തെന്നിന്ത്യയിൽ നിന്നായത് കൊണ്ട് പലപ്പോഴും താഴ്ത്തിക്കെട്ടുകയും അപമാനിക്കുകയും ചെയ്തിട്ടുണ്ട്. ഹിന്ദി ഭാഷയിൽ എനിക്ക് പ്രാവീണ്യമുണ്ട്. റോക്കറ്റ് ബോയ്സിലും ഫർസിയിലും ഞാൻ തന്നെയാണ് ഡബ് ചെയ്തത്. എന്നാൽ തന്റെ കഴിവുകൾ ബോളിവുഡിലെ ആളുകൾ അവഗണിച്ചു. ഒരുപാട് പേർ എന്നോട് അപമാനകരമായ രീതിയിൽ പെരുമാറി. വാക്കുകൾ കൊണ്ട് മാത്രമല്ല, പ്രവൃത്തി കൊണ്ടും. ഇത്തരത്തിലുള്ള മോശം മനോഭാവം കാരണം തുടക്കത്തിൽ ചില ആശങ്കകൾ ഉണ്ടായിരുന്നു; റെജീന പറഞ്ഞു. ഹിന്ദുസ്ഥാൻ ടെെംസിന് നൽകിയ അഭിമുഖത്തിലാണ് പരാമർശം.
‘ഷൂട്ടിങ് സെറ്റുകളിൽ മൈക്കിലൂടെ എല്ലാവരുടെയും മുന്നിൽ വെച്ച് അസഭ്യം പറയുന്ന സംവിധായകർക്കൊപ്പം ഞാൻ ജോലി ചെയ്തിട്ടുണ്ട്. എന്നാൽ ഇതിൽ നിന്നും തികച്ചും വ്യത്യസ്തനായ വ്യക്തിയാണ് സംവിധായകൻ മധുർ ഭണ്ഡാർക്കർ. അദ്ദേഹത്തിന്റെ പുതിയ ചിത്രമായ ദി വൈവ്സിൽ അഭിനയിക്കുമ്പോൾ അദ്ദേഹം ഒരിക്കൽ പോലും നിയന്ത്രണം വിടുന്നത് കണ്ടിട്ടില്ല. എപ്പോഴും പോസിറ്റീവായും ഊർജ്ജസ്വലനായും എല്ലാവരെയും ഉൾക്കൊള്ളുന്ന രീതിയിലുമാണ് അദ്ദേഹം പെരുമാറുന്നത്; റെജീന പറഞ്ഞു.
