സൂര്യയെ നായകനാക്കി ലിംഗുസാമി ഒരുക്കിയ ആക്ഷൻ ചിത്രമാണ് ‘അഞ്ചാൻ’. ഒരു ഗ്യാങ്സ്റ്റർ ത്രില്ലർ സ്വഭാവത്തിലൊരുങ്ങിയ സിനിമ ബോക്സ് ഓഫീസിൽ വലിയ പരാജയമായിരുന്നു. മോശം പ്രതികരണമായിരുന്നു സിനിമയ്ക്ക് ലഭിച്ചത്. ചിത്രത്തിന്റെ തിരക്കഥയ്ക്കും മേക്കിങ്ങിനും എല്ലാം വിമർശനങ്ങൾ ലഭിച്ചിരുന്നു. ഇപ്പോഴിതാ സിനിമ വീണ്ടും റീ റിലീസ് ചെയ്തിരിക്കുകയാണ്.
വമ്പൻ വരവേൽപ്പാണ് സിനിമയ്ക്ക് തമിഴ്നാട്ടിൽ നിന്നും ലഭിക്കുന്നത്. വലിയ ആരവങ്ങളോടെയും ആവേശത്തോടെയുമാണ് സൂര്യ ആരാധകർ വീണ്ടും സിനിമയെ വരവേൽക്കുന്നത്.
തിയേറ്ററിൽ ചിത്രം ആഘോഷിക്കുന്ന ആരാധകരുടെ വീഡിയോകൾ സോഷ്യൽ മീഡിയയിൽ ഇപ്പോൾ വൈറലാണ്. ആദ്യ ദിനം മികച്ച കളക്ഷൻ തന്ന സിനിമ നേടുമെന്ന കണക്കൂട്ടലിലാണ് അണിയറപ്രവർത്തകർ. കേരളത്തിൽ സിനിമയുടെ റീ റിലീസ് ചില ലൈസൻസ് പ്രശ്നങ്ങൾ മൂലം ഉണ്ടായിരുന്നില്ല. മറ്റൊരു തീയതിയിൽ സിനിമ കേരളത്തിൽ എത്തും. ഈ റീ റിലീസ് പതിപ്പിൽ സൂര്യയുടെ ഭാഗങ്ങൾ മാത്രമേയുള്ളുവെന്നും ആദ്യം സിനിമ റിലീസ് ആയപ്പോൾ ഒരുപാട് തെറ്റുകൾ സംഭവിച്ചിട്ടുണ്ടെന്നും ലിംഗുസാമി നേരത്തെ പറഞ്ഞിരുന്നു. സിനിമയിൽ ഉണ്ടായിരുന്ന ലാഗും മിക്ക സീനുകളും ചുരുക്കിയിട്ടുണ്ടെന്നും അദ്ദേഹം പറഞ്ഞു.
വിദ്യുത് ജംവാൽ, സാമന്ത, മനോജ് ബാജ്പെ, സൂരി, മുരളി ശർമ്മ എന്നിവരാണ് സിനിമയിൽ മറ്റു പ്രധാന വേഷങ്ങളിൽ എത്തിയത്. യുവൻ ശങ്കർ രാജയാണ് സിനിമയ്ക്കായി സംഗീതം ഒരുക്കിയത്. സിദ്ധാർത്ഥ് റോയ് കപൂർ, എൻ സുബാഷ് ചന്ദ്രബോസ് എന്നിവരാണ് സിനിമ നിർമിച്ചത്. വമ്പൻ ഹൈപ്പിൽ പുറത്തിറങ്ങിയ സിനിമയ്ക്ക് എന്നാൽ പ്രേക്ഷകരുടെ പ്രതീക്ഷകൾക്കൊത്ത് ഉയരാൻ സാധിച്ചിരുന്നില്ല. ചിത്രത്തിന്റെ പരാജയത്തെത്തുടർന്ന് നിരവധി ട്രോളുകളാണ് സൂര്യയ്ക്കും ലിംഗുസാമിക്കും നേരിടേണ്ടി വന്നിരുന്നത്.




