ഇന്ത്യന് സംഗീതലോകത്തെ അതികായയും ഭാരതരത്ന വിജയിയുമായ എം.എസ്. സുബ്ബുലക്ഷ്മി അമ്മയുടെ അസാധാരണ ജീവിത കഥ ബിഗ് സ്ക്രീനിലേക്ക് എത്തുന്നു. ‘എം എസ്- എ ലെഗസി ഓണ് സ്ക്രീന്’ എന്ന് പേരിട്ടിരിക്കുന്ന ഈ ബിഗ് ബഡ്ജറ്റ് ബയോപിക്കില് രശ്മിക മന്ദാനയാണ് എം എസ് സുബ്ബുലക്ഷ്മിയായി കേന്ദ്രകഥാപാത്രത്തെ അവതരിപ്പിക്കുന്നത്. ഇന്നത്തെ യുവതലമുറയുടെ തരംഗമായ അനിരുദ്ധ് രവിചന്ദറാണ് ചിത്രത്തിന് സംഗീതം പകരുന്നതെന്ന പ്രത്യേകതയുമുണ്ട്. ഗൗതം തിന്നനൂരി സംവിധാനം ചെയ്യുന്ന ചിത്രം അല്ലു അരവിന്ദ്, റോക്ക് ലൈന് വെങ്കിടേഷ്, ബണ്ണി വാസു എന്നിവര് ചേര്ന്നാണ് നിര്മ്മിക്കുന്നത്.
എം എസ് സുബ്ബുലക്ഷ്മിയുടെ 110-ാം ജന്മവാര്ഷികത്തോടനുബന്ധിച്ച് ചെന്നൈ മ്യൂസിക് അക്കാദമിയില് വെച്ച് നടന്ന ചടങ്ങില് ചിത്രം ഔദ്യോഗികമായി പ്രഖ്യാപിച്ചു. എം.എസ്. സുബ്ബുലക്ഷ്മി അമ്മയുടെ കാലാതീതമായ സംഗീത പാരമ്പര്യത്തെ പുതിയൊരു തലമുറയുമായി ബന്ധിപ്പിക്കാന് ശ്രമിക്കുന്നു എന്നതാണ് ഈ വലിയ ചിത്രത്തിന്റെ ഏറ്റവും ആവേശകരമായ വശങ്ങളിലൊന്ന്. ഇന്നത്തെ തലമുറയിലെ ഏറ്റവും ആഘോഷിക്കപ്പെടുന്നതും സ്വാധീനമുള്ളതുമായ സംഗീതപ്രതിഭകളില് ഒരാളായ അനിരുദ്ധ് രവിചന്ദര് സംഗീതസംവിധായകനായി ചിത്രത്തിനൊപ്പം ചേരുകയാണ്.
സിനിമയ്ക്കും സംഗീതത്തിനും വളരെ അപ്പുറത്തേക്ക് സാന്നിധ്യമുള്ള ഒരു ഇതിഹാസത്തെ അവതരിപ്പിക്കുക എന്ന അസാധാരണമായ ഉത്തരവാദിത്തമാണ് പുതിയ തലമുറയിലെ ഏറ്റവും പ്രിയപ്പെട്ട നടിമാരിലൊരാളായ രശ്മിക ഏറ്റെടുക്കുന്നത്. ആ ഇതിഹാസ ശബ്ദത്തിന് പിന്നിലെ സ്ത്രീയെ – അവരുടെ വികാരങ്ങള്, ആഗ്രഹങ്ങള്, പോരാട്ടങ്ങള്, ശക്തി, ആത്മീയ യാത്ര എന്നിവയെ പുതിയ തലമുറയിലെ പ്രേക്ഷകരിലേക്ക് അടുപ്പിക്കാന് രശ്മികയുടെ അഭിനയത്തിലൂടെ ചിത്രം ലക്ഷ്യമിടുന്നുവെന്ന് അണിയറ പ്രവര്ത്തകര് പറഞ്ഞു.
